گداگری کے خاتمے کیلئے جمن شاہ میں پبلک ویلفیئر سوسائٹی کی ریلی، معاشرتی برائی کے خلاف شعور بیدار کرنے کا عزم “بھکاریوں کو دی جانے والی خیرات اصل مستحقین کی حق تلفی ہے”، حکیم عبداللطیف چوہان معززین شہریوں اور سماجی شخصیات کی بھرپور شرکت، اسدادِ گداگری مہم کو سراہا گیا

جمن شاہ (نمائندہ لیہ ٹی وی) پبلک ویلفیئر سوسائٹی جمن شاہ کے زیر اہتمام اسدادِ گداگری مہم کے سلسلے میں ایک آگاہی ریلی نکالی گئی، جس میں معززینِ علاقہ، سماجی شخصیات، نوجوانوں اور سوسائٹی کے عہدیداران نے بھرپور شرکت کی۔ ریلی کی قیادت صدر پبلک ویلفیئر سوسائٹی حکیم عبداللطیف چوہان نے کی۔ریلی کے شرکاء نے گداگری کے خاتمے، محنت کی عظمت اور مستحق افراد کی حقیقی مدد کے حوالے سے بینرز اور پلے کارڈز اٹھا رکھے تھے۔ اس موقع پر خطاب کرتے ہوئے حکیم عبداللطیف چوہان نے کہا کہ گداگری صرف معاشی نہیں بلکہ ایک سنگین سماجی مسئلہ بن چکی ہے، جس کے منفی اثرات پورے معاشرے پر مرتب ہو رہے ہیں۔ انہوں نے کہا کہ پیشہ ور بھکاری معاشرتی نظام کو متاثر کر رہے ہیں جبکہ حقیقی مستحق افراد اپنے بنیادی حقوق سے محروم رہ جاتے ہیں۔انہوں نے کہا کہ عوام کو چاہیے کہ وہ اپنی خیرات اور زکوٰۃ اپنے اردگرد موجود حقیقی مستحقین تک پہنچائیں کیونکہ بھکاریوں کو دی جانے والی خیرات کئی مرتبہ اصل حقداروں کی حق تلفی کا باعث بنتی ہے۔ انہوں نے مزید کہا کہ نوجوان نسل کو محنت، خودداری اور باعزت روزگار کی طرف راغب کرنا وقت کی اہم ضرورت ہے۔ریلی کے شرکاء نے پبلک ویلفیئر سوسائٹی کے سماجی و فلاحی اقدامات کو سراہتے ہوئے کہا کہ اس قسم کی آگاہی مہمات معاشرے میں مثبت تبدیلی لانے میں اہم کردار ادا کرتی ہیں۔ شرکاء نے اس عزم کا اظہار بھی کیا کہ معاشرتی برائیوں کے خاتمے اور فلاحی سرگرمیوں کے فروغ کیلئے ایسے اقدامات جاری رکھے جائیں گے۔