کوٹ سلطان (نمائندہ لَیَّہ ٹی وی) تھانہ کوٹ سلطان کی حدود موضع علی دستی میں ایک افسوسناک واقعہ پیش آیا جہاں مسجد کے امام پر کمسن بچے کے ساتھ مبینہ بدفعلی کی کوشش کا الزام عائد کیا گیا ہے۔پولیس ذرائع کے مطابق متاثرہ بچے کی والدہ کی مدعیت میں مقدمہ درج کرکے قانونی کارروائی کا آغاز کر دیا گیا ہے۔ایف آئی آر کے متن کے مطابق کمسن بچہ عشاء کی نماز ادا کرنے کیلئے مسجد گیا تھا، جہاں واپسی کے وقت مبینہ طور پر مسجد کے امام قاری ساجد دستی نے بچے کو بہلا پھسلا کر نامناسب حرکت کی کوشش کی۔واقعے کی اطلاع سامنے آنے کے بعد علاقے میں تشویش اور غم و غصے کی فضا پھیل گئی، جبکہ شہریوں نے مطالبہ کیا ہے کہ ایسے واقعات کی روک تھام کیلئے سخت اقدامات کیے جائیں تاکہ مذہبی مقامات کا تقدس برقرار رکھا جا سکے اور بچوں کا تحفظ یقینی بنایا جا سکے۔ذرائع کے مطابق مقدمہ مزید تفتیش کیلئے سی سی ڈی کے حوالے کیے جانے کا امکان ہے، جبکہ پولیس کا کہنا ہے کہ واقعے کی ہر پہلو سے تحقیقات جاری ہیں۔
