لَیَّہ (نمائندہ لَیَّہ ٹی وی) ڈسٹرکٹ ٹریفک پولیس کے زیر اہتمام مدرسہ اشرف المدارس میں ٹریفک ایجوکیشن اور روڈ سیفٹی کے حوالے سے آگاہی لیکچر کا انعقاد کیا گیا۔وزیراعلیٰ پنجاب مریم نواز شریف اور ڈی آئی جی ٹریفک پنجاب وقاص نزیر کی ہدایات پر ڈی ٹی او لَیَّہ ظفر کی قیادت میں ٹریفک پولیس ٹیم نے طلبہ اور اساتذہ کو ٹریفک قوانین اور روڈ سیفٹی کے اصولوں سے آگاہ کیا۔ٹریفک ایجوکیشن یونٹ کے افسران اقبال کریم اور محمد خان نے لیکچر دیتے ہوئے پیدل چلنے کے محفوظ اصول، ہیلمٹ اور سیٹ بیلٹ کے استعمال، ٹریفک سگنلز کی پابندی، ون وے کی خلاف ورزی سے بچنے اور کم عمر ڈرائیونگ کے نقصانات پر تفصیلی روشنی ڈالی۔اس موقع پر ٹریفک پولیس کی جانب سے طلبہ کو “ٹریفک ایمبیسیڈر” بننے کی ترغیب دی گئی اور کہا گیا کہ قانون کا احترام ہی محفوظ معاشرے کی ضمانت ہے۔طلبہ نے لیکچر میں بھرپور دلچسپی کا اظہار کرتے ہوئے ٹریفک قوانین پر عملدرآمد اور دوسروں تک آگاہی پہنچانے کے عزم کا اظہار کیا۔
