لَیَّہ (نمائندہ لیہ ٹی وی)ڈپٹی کمشنر لیہ آصف علی ڈوگر کی زیر صدارت محکمہ صحت سے متعلق ڈسٹرکٹ پرچیز کمیٹی کا اجلاس منعقد ہوا۔اجلاس میں سرکاری ہسپتالوں اور مراکزِ صحت میں ادویات کی بروقت خریداری، معیاری ادویات کی دستیابی، طبی سہولیات کی بہتری اور خریداری کے عمل میں شفافیت کو یقینی بنانے کے امور کا تفصیلی جائزہ لیا گیا۔ اجلاس میں محکمہ صحت کو درپیش ضروریات، ادویات کے موجودہ سٹاک، آئندہ خریداری کے لائحہ عمل اور مریضوں کو بہتر طبی سہولیات کی فراہمی کے لیے انتظامی اقدامات پر غور کیا گیا۔ڈپٹی کمشنر آصف علی ڈوگر نے ہدایت کی کہ ادویات کی خریداری کا عمل مقررہ قواعد و ضوابط کے مطابق مکمل شفافیت کے ساتھ انجام دیا جائے، معیاری ادویات کی فراہمی کو یقینی بنایا جائے اور ضلع بھر کے ہسپتالوں میں مریضوں کو علاج معالجہ کی سہولیات میں کسی قسم کی کمی محسوس نہ ہو۔ انہوں نے کہا کہ صحت عامہ کے شعبہ میں مؤثر حکمت عملی اور بروقت فیصلے عوام کو بہتر طبی سہولیات کی فراہمی میں اہم کردار ادا کرتے ہیں۔اجلاس میں چیف ایگزیکٹو آفیسر ہیلتھ ڈاکٹر شاہد ریاض،ڈی ایچ او ڈاکٹر غلام محی الدین ودیگر موجود تھے۔
