چوک اعظم میں “معرکۂ حق” سیمینار اور پاک فوج سے اظہارِ یکجہتی ریلی کا انعقاد سول ڈیفنس کے زیر اہتمام ریلی میں عوام، ایل پی جی ایسوسی ایشن اور مختلف شعبہ ہائے زندگی سے تعلق رکھنے والے افراد کی بھرپور شرکت

لَیَّہ (نمائندہ لیہ ٹی وی)ڈپٹی کمشنر/کنٹرولر سول ڈیفنس آصف علی ڈوگر کی ہدایات پر محکمہ سول ڈیفنس کے زیر اہتمام چوک اعظم میں "معرکۂ حق” کے عنوان سے سیمینار اور یکجہتی ریلی کا انعقاد کیا گیا۔ سیمینار سے سول ڈیفنس آفیسر محمد توقیر عباس نے خطاب کرتے ہوئے کہا کہ وطنِ عزیز کا دفاع ہر شہری کی قومی ذمہ داری ہے جبکہ قومی سلامتی، اتحاد اور استحکام کے لیے پوری قوم افواجِ پاکستان کے شانہ بشانہ کھڑی ہے۔تقریب میں وطن سے محبت، قومی سلامتی کے تحفظ اور افواجِ پاکستان کے ساتھ غیر متزلزل وابستگی کے عزم کا اعادہ کیا گیا۔بعدازاں چوک اعظم کی مین شاہراہ پر عظیم الشان ریلی نکالی گئی جس میں عوام الناس، ایل پی جی ایسوسی ایشن کے اراکین اور مختلف شعبہ ہائے زندگی سے تعلق رکھنے والے افراد نے بھرپور شرکت کی۔ شرکاء نے پاکستان اور پاک فوج کے حق میں فلک شگاف نعرے لگائے اور قومی جذبے، اتحاد اور یکجہتی کا عملی مظاہرہ کیا۔