لَیَّہ (نمائندہ لیہ ٹی وی) عالمی یومِ تھیلیسیمیا کے موقع پر پنجاب تھیلیسیمیا اینڈ ادر جینیٹک ڈس آرڈرز پریوینشن اینڈ ریسرچ انسٹی ٹیوٹ (PTGD) کے زیرِ اہتمام سکول آف الائیڈ ہیلتھ سائنسز لَیَّہ میں آگاہی سیمینار، واک اور اسکریننگ کیمپ کا انعقاد کیا گیا۔ تقریب کی نگرانی ڈسٹرکٹ فوکل پرسن محمد شیر زمان نے کی۔سیمینار کا آغاز تلاوتِ کلامِ پاک اور نعتِ رسولِ مقبول ﷺ سے ہوا۔ تقریب سے خطاب کرتے ہوئے سکول آف الائیڈ ہیلتھ سائنسز کی پرنسپل ڈاکٹر مہوش نے کہا کہ تھیلیسیمیا جیسی موذی بیماری سے بچاؤ کیلئے احتیاطی تدابیر انتہائی ضروری ہیں۔ انہوں نے کہا کہ شادی سے قبل خون کے ٹیسٹ اور اسکریننگ کے ذریعے آنے والی نسلوں کو تھیلیسیمیا سے محفوظ بنایا جا سکتا ہے، اس لیے عوام میں شعور بیدار کرنا وقت کی اہم ضرورت ہے۔ڈسٹرکٹ فوکل پرسن محمد شیر زمان نے شرکاء کو ادارے کے اغراض و مقاصد سے آگاہ کرتے ہوئے بتایا کہ PTGD کی جانب سے تھیلیسیمیا کی تشخیص کے تمام ٹیسٹ مکمل طور پر مفت فراہم کیے جا رہے ہیں۔ انہوں نے تقریب کے بہترین انتظامات پر ادارہ کی انتظامیہ اور پرنسپل کا شکریہ ادا کیا۔سیمینار کے بعد آگاہی واک کا بھی انعقاد کیا گیا جس میں اساتذہ، طلباء اور فیکلٹی ممبران نے بھرپور شرکت کی۔ اس موقع پر قائم اسکریننگ کیمپ میں 58 طلباء اور عملے کے افراد کے خون کے نمونے حاصل کیے گئے تاکہ ان کا مفت معائنہ کیا جا سکے۔شرکاء نے اس عزم کا اظہار کیا کہ تھیلیسیمیا سے بچاؤ کیلئے آگاہی مہم کو مزید مؤثر بنایا جائے گا تاکہ مستقبل میں اس بیماری کے پھیلاؤ کو روکا جا سکے۔
