لیہ(نمائندہ لیہ ٹی وی ) ڈپٹی کمشنر آصف علی ڈوگر کا بہادر ڈیجیٹل لا ئبریری کا اچانک دورہ۔ ڈپٹی کمشنر نے لائبریری کی بحالی کے لیے جاری اقدامات کا تفصیلی جائزہ لیا۔ انہوں نے تزئین و آرائش، گراسی پلاٹس کی بہتری، آڈیٹوریم پر جاری کام، کتابوں کی دستیابی، کمپیوٹرز اور فرنیچر کا معائنہ کیا۔ اس موقع پر ڈپٹی کمشنر نے کہا کہ لائبریری شہر کو منفرد پہچان دیتی ہیں۔ بہادر ڈیجیٹل لائبریری اہلیان لیہ کے لئے ایک قیمتی تحفہ ہے۔ لائبریری کی بحالی کے تمام کام جلد از جلد مکمل کیے جائیں اور معیار پر کوئی سمجھوتہ نہ کیا جائے۔ انہوں نے کہا کہ جدید سہولیات سے آراستہ لائبریری طلبہ اور شہریوں کے لیے علم کے فروغ میں اہم کردار ادا کرے گی۔ ڈپٹی کمشنر نے مزید ہدایت کی کہ لائبریری میں نئی کتب کا اضافہ کیا جائے، کمپیوٹر لیب کو فعال رکھا جائے اور قارئین کو بہترین ماحول کی فراہمی کے لئے ہر ممکن اقدامات اٹھائے جائیں تاکہ زیادہ سے زیادہ افراد اس سہولت سے مستفید ہو سکیں۔ ڈپٹی کمشنر نے ہدایت کی کہ لائبریری کے آڈیٹوریم کو جدید تقاضوں سے ہم آہنگ بنایا جائے تاکہ ادبی و علمی تقریبات کا انعقاد ہو سکے۔ ڈپٹی کمشنر نے اس موقع پر لائبریری فرنیچر کی کوالٹی کا بھی جائزہ لیا۔ انہوں نے ہدایت کی کہ لائبریری کے تمام گراسی پلاٹس کو منفرد سایہ دار درختوں اور پھولدار پودوں سے سجایا جائے اور ان کی تواتر سے آبیاری کی جائے۔ اس موقع پر ایکسیئن بلڈنگ میاں سجاد اور اسسٹنٹ ڈائریکٹر اسحاق کھیرانی بھی ان کے ہمراہ تھے۔
