لیہ (نمائندہ لیہ ٹی وی) مینیجنگ ڈائریکٹر/ایڈیشنل ڈپٹی کمشنر جنرل شبیر احمد ڈوگر صاف ستھرا پنجاب پروگرام کے تحت مسلسل فیلڈ میں متحرک ہیں۔ انہوں نے چوک اعظم شہر کا دورہ کیا جہاں مختلف وارڈز اور مرکزی مارکیٹوں میں صفائی ستھرائی کے انتظامات کا تفصیلی معائنہ کیا۔ دورے کے دوران متعلقہ افسران بھی ان کے ہمراہ تھے۔ اے ڈی سی جی نے مختلف علاقوں میں صفائی کی صورتحال کا جائزہ لیا اور موقع پر موجود عملے کو ہدایات جاری کیں۔ انہوں نے شہریوں سے بھی ملاقات کی اور ویسٹ مینجمنٹ کمپنی کی کارکردگی کے حوالے سے فیڈ بیک حاصل کیا۔ اس موقع پر شبیر احمد ڈوگر نے ہدایت کی کہ صفائی کے معیار کو ہر صورت برقرار رکھا جائے اور گلی محلوں میں سیوریج سسٹم کو ہمہ وقت فعال رکھا جائے تاکہ شہریوں کو صاف ستھرا اور صحت مند ماحول فراہم کیا جا سکے۔ انہوں نے مزید کہا کہ صفائی کے نظام میں کسی قسم کی غفلت برداشت نہیں کی جائے گی اور متعلقہ افسران اپنی ذمہ داریاں احسن طریقے سے انجام دیں۔
