لیہ(نمائندہ لیہ ٹی وی) روڈ سیفٹی آگاہی مہم: ٹریفک قوانین کی پابندی سے قیمتی جانوں کا تحفظ ممکن ہے، ڈی ایس پی راؤ عمر فاروق۔ ڈی ایس پی پٹرولنگ راؤ عمر فاروق نے لیہ جنرل بس اسٹینڈ لاڈی اڈا پر ڈرائیوران اور اڈا مالکان کو روڈ سیفٹی آگاہی مہم کے حوالے سے لیکچرز دیتے ہوئے کہا ہے کہ مہم کا بنیادی مقصد شہریوں میں ٹریفک قوانین کی اہمیت اجاگر کرنا اور قیمتی انسانی جانوں کا تحفظ یقینی بنانا ہے۔ انہوں نے کہا کہ پنجاب ہائی وے پٹرولنگ کی جانب سے عوام الناس کو لین لائن کی پابندی، ہیلمٹ اور سائیڈ مررز کے استعمال، اوور اسپیڈنگ سے گریز اور محتاط ڈرائیونگ کے حوالے سے آگاہ کیا جا رہا ہے۔انہوں نے موٹر سائیکل سواروں کو ہدایت کی کہ وہ ہر صورت ہیلمٹ کا استعمال یقینی بنائیں، سائیڈ شیشے نصب رکھیں اور دوران سفر لین لائن کی مکمل پابندی کریں۔ ڈی ایس پی راؤ عمر فاروق نے کہا کہ تیز رفتاری، لاپرواہی سے اوورٹیک کرنا اور ٹریفک قوانین کی خلاف ورزی حادثات کی بڑی وجوہات ہیں جن سے بچاؤ ذمہ دارانہ رویے سے ہی ممکن ہے۔ شہریوں کو تاکید کی گئی کہ وہ سڑک کے بائیں جانب سفر کریں اور اپنی و دوسروں کی جانوں کے تحفظ کو اولین ترجیح دیں۔انہوں نے مزید کہا کہ موٹر سائیکل پر ٹرپل سواری مکمل طور پر ممنوع ہے جبکہ بسوں کی چھتوں پر سفر کی اجازت نہیں دی جائے گی۔ اسکول رکشوں میں بچوں کو سائیڈوں پر لٹکانے یا چھت پر بٹھانے پر سخت قانونی کارروائی عمل میں لائی جائے گی۔ اسی طرح جعلی نمبر پلیٹس استعمال کرنے والی گاڑیوں کے خلاف بھی قانون کے مطابق کارروائی کی جائے گی۔ڈی ایس پی راؤ عمر فاروق نے واضح کیا کہ یہ اقدامات صرف چالان کرنے کے لیے نہیں بلکہ قیمتی انسانی جانوں کے تحفظ کے لیے کیے جا رہے ہیں۔ انہوں نے خبردار کیا کہ ٹریفک قوانین کی خلاف ورزی پر بلاامتیاز قانونی کارروائی عمل میں لائی جائے گی اور شہریوں سے اپیل کی کہ وہ محفوظ سفر کو یقینی بناتے ہوئے ذمہ دار شہری ہونے کا ثبوت دیں۔
