لاہور (نمائندہ لیہ ٹی وی) لاہور میں ٹریفک پولیس کی کارروائی کے دوران ایک حیران کن انکشاف سامنے آیا ہے جہاں ایک شہری کے نام پر 421 گاڑیاں، رکشے اور موٹر سائیکلیں رجسٹرڈ ہونے کا ریکارڈ سامنے آگیا۔ترجمان ٹریفک پولیس کے مطابق جنرل ہولڈ اپ کے دوران شہری باز محمدکی موٹر سائیکل کو چیک کیا گیا تو ریکارڈ کی جانچ پڑتال کے دوران معلوم ہوا کہ اس کے نام پر مجموعی طور پر 421 گاڑیاں، رکشے اور موٹر سائیکلیں رجسٹرڈ ہیں۔ یہ انکشاف سامنے آنے پر متعلقہ حکام نے مزید تحقیقات کا آغاز کر دیا ہے۔ٹریفک پولیس کے مطابق باز محمد کے نام پر رجسٹرڈ گاڑیوں کے خلاف 1526 ای چالان بھی واجب الادا ہیں جن کی مجموعی مالیت 20 لاکھ 88 ہزار 800 روپے سے زائد بنتی ہے۔ حکام کا کہنا ہے کہ اتنی بڑی تعداد میں گاڑیوں کی رجسٹریشن اور بھاری جرمانوں کے معاملے کی مختلف پہلوؤں سے چھان بین کی جا رہی ہے۔ترجمان نے بتایا کہ کارروائی کے دوران باز محمد کی موٹر سائیکل کو قبضے میں لے کر تھانہ مسلم ٹاؤن میں بند کر دیا گیا ہے جبکہ متعلقہ اداروں کو بھی معاملے سے آگاہ کر دیا گیا ہے۔ٹریفک پولیس حکام کے مطابق شہریوں کے نام پر غیر معمولی تعداد میں رجسٹرڈ گاڑیوں اور بقایا ای چالانوں کی نشاندہی کے لیے خصوصی مہم جاری ہے تاکہ ٹریفک قوانین کی مؤثر عملداری کو یقینی بنایا جا سکے اور واجبات کی وصولی ممکن بنائی جا سکے۔حکام کا کہنا ہے کہ تحقیقات مکمل ہونے کے بعد مزید قانونی کارروائی عمل میں لائی جائے گی۔
