اسلام آباد(نمائندہ لیہ ٹی وی) قومی اسمبلی اور سینیٹ کے اجلاس آج طلب کر لیے گئے ہیں، جن کے باقاعدہ نوٹیفکیشن بھی جاری کر دیے گئے ہیں۔منگل کو جاری کیے گئے نوٹیفکیشن کے مطابق قومی اسمبلی کا اجلاس 10 جون بروز بدھ شام 5 بجے پارلیمنٹ ہاؤس اسلام آباد میں منعقد ہوگا۔ اجلاس میں ملکی سیاسی، اقتصادی اور پارلیمانی امور پر غور کیے جانے کا امکان ہے۔دوسری جانب سینیٹ آف پاکستان کا اجلاس بھی آج شام 4 بجے طلب کر لیا گیا ہے، جس میں ایوان بالا کے ارکان مختلف قومی اور عوامی اہمیت کے معاملات پر اظہار خیال کریں گے۔پارلیمانی ذرائع کے مطابق بجٹ اجلاسوں اور آئندہ مالی سال کی حکومتی ترجیحات کے تناظر میں دونوں ایوانوں کے اجلاس خصوصی اہمیت کے حامل قرار دیے جا رہے ہیں۔
