لیہ (نمائندہ لیہ ٹی وی) ڈسٹرکٹ پولیس آفیسر لیہ حسن جاوید بھٹی نے کہا ہے کہ گزشتہ ساڑھے تین سے چار ماہ کے دوران لیہ پولیس نے جرائم پیشہ عناصر کے خلاف بھرپور کارروائیاں کرتے ہوئے 304 مقدمات میں تقریباً 3 کروڑ 35 لاکھ روپے مالیت کی ریکوری کی ہے۔ ان خیالات کا اظہار انہوں نے ریکور شدہ مال مسروقہ کی تقسیم کے حوالے سے منعقدہ پریس کانفرنس سے خطاب کرتے ہوئے کیا۔ڈی پی او حسن جاوید بھٹی نے میڈیا نمائندگان، انجمن تاجران کے عہدیداران، معزز شہریوں اور متاثرہ افراد کا شکریہ ادا کرتے ہوئے کہا کہ اس عرصے کے دوران ایک کروڑ 16 لاکھ روپے نقد رقم برآمد کی گئی۔ پولیس نے 39 مویشی بھی ریکور کیے جن میں 25 گائے، بچھڑے اور 14 بکریاں شامل ہیں۔ اس کے علاوہ متعدد موٹر سائیکلیں، ساڑھے چھ تولہ سونا، 239 تولہ چاندی، سولر موٹر پمپ، موبائل فونز اور دیگر 73 قیمتی اشیاء بھی برآمد کی گئیں۔انہوں نے بتایا کہ یہ کامیابیاں 14 جرائم پیشہ گینگز کے 47 ارکان کی گرفتاری سے حاصل ہوئیں جن میں 4 مویشی چور گینگز، 2 موٹر سائیکل چور گینگز، 3 نقب زن گینگز اور 2 ڈکیت گینگز شامل ہیں۔ڈی پی او نے مزید بتایا کہ رواں سال اب تک 886 اشتہاری اور عدالتی مفرور ملزمان کو گرفتار کیا جا چکا ہے جو گزشتہ سال کے مقابلے میں نمایاں اضافہ ہے۔ اسلحہ کے خلاف کارروائیوں کے دوران 385 مقدمات درج کیے گئے جو گزشتہ سال کے مقابلے میں 263 زیادہ ہیں۔انہوں نے کہا کہ لیہ میں مجموعی جرائم کی شرح میں 22 فیصد کمی ریکارڈ کی گئی ہے جبکہ پراپرٹی جرائم اور سنیچنگ کے واقعات میں 41 فیصد کمی آئی ہے۔ موٹر سائیکل سنیچنگ میں 68 فیصد اور موٹر سائیکل چوری کے واقعات میں 72 فیصد کمی واقع ہوئی ہے۔ اسی طرح مویشی چوری اور سرقہ عام کے 310 مقدمات کم ہوئے ہیں جبکہ منشیات فروشوں کے خلاف کارروائیوں میں 37 فیصد اضافہ ریکارڈ کیا گیا ہے۔پریس کانفرنس کے اختتام پر ڈی پی او حسن جاوید بھٹی نے مدعیان میں برآمد شدہ مال مسروقہ وریکعنقدی تقسیم کی اور اس موقع پر کہا کہ لیہ پولیس جرائم کے خاتمے، شہریوں کے جان و مال کے تحفظ اور قانون کی عملداری کے لیے اپنی کوششیں جاری رکھے گی۔
