لَیَہ (نمائندہ لَیَہ ٹی وی) محرم الحرام کے دوران امن و امان کے قیام اور عزاداری پروگراموں کی فول پروف سکیورٹی کے لیے لَیَہ پولیس نے جامع سکیورٹی پلان جاری کر دیا ہے۔ ڈی پی او لَیَہ حسن جاوید بھٹی کی ہدایت پر انچارج سکیورٹی اسماعیل احمد ملک کی زیر نگرانی مرتب کردہ پلان کے مطابق ضلع بھر میں 1934 مجالس اور 133 عزاداری جلوس منعقد ہوں گے۔
پولیس کے مطابق 1934 مجالس میں 162 اے کیٹیگری، 291 بی کیٹیگری اور 1481 سی کیٹیگری کی مجالس شامل ہیں، جبکہ 133 جلوسوں میں 32 اے کیٹیگری، 28 بی کیٹیگری اور 73 سی کیٹیگری کے جلوس شامل ہیں۔
سکیورٹی فرائض کے لیے 1200 سے زائد پولیس افسران و اہلکار تعینات کیے گئے ہیں جن میں 6 ڈی ایس پیز، 10 انسپکٹرز، 33 سب انسپکٹرز، 57 اے ایس آئیز، 50 ہیڈ کانسٹیبلز اور ایک ہزار سے زائد کانسٹیبلان شامل ہیں۔
اطلاع رسانی اور نگرانی کے لیے ڈی پی او آفس میں خصوصی کنٹرول روم قائم کر دیا گیا ہے۔ حساس مقامات اور اہم جلوسوں کی سکیورٹی کے لیے ایلیٹ فورس کمانڈوز کی خصوصی ٹیمیں تشکیل دی گئی ہیں جبکہ سول لباس میں اہلکار بھی مشکوک سرگرمیوں کی نگرانی کریں گے۔
ڈی پی او حسن جاوید بھٹی نے کہا کہ موجودہ ملکی حالات کے تناظر میں سکیورٹی چیلنجز بڑھ گئے ہیں، تاہم لَیَہ پولیس ہر صورتحال سے نمٹنے کے لیے مکمل طور پر تیار ہے۔ انہوں نے کہا کہ مذہبی منافرت پر مبنی مواد، وال چاکنگ اور اشتعال انگیز بینرز پر مکمل پابندی عائد ہے اور قانون کی خلاف ورزی کرنے والوں کے خلاف سخت کارروائی کی جائے گی۔
انہوں نے مزید بتایا کہ اہم مجالس اور جلوسوں کے مقامات پر سی سی ٹی وی کیمرے اور واک تھرو گیٹس نصب کیے جائیں گے، جبکہ شرکاء کی جامع تلاشی جدید آلات کے ذریعے لی جائے گی۔ جلوسوں کے راستوں سے ملحقہ گلیوں کو بیریئرز اور خاردار تاروں کے ذریعے بند کیا جائے گا اور بلند مقامات و چھتوں پر تربیت یافتہ پولیس اہلکار تعینات رہیں گے۔
