لیہ(نمائندہ لیہ ٹی وی)سیکرٹری زراعت پنجاب افتخار علی سہو کی سربراہی اور ڈائریکٹر جنرل زراعت (پیسٹ وارننگ) ڈاکٹر عامر رسول کی ہدایات پر محکمہ زراعت (پلانٹ پروٹیکشن) / پیسٹ وارننگ پنجاب کی جانب سے ضلع لیہ میں گلابی سنڈی کی بے موسمی افزائش کی روک تھام کے لیے کپاس کی چھڑیوں کے الٹ پلٹ اور تلفی کی مہم بھرپور انداز میں جاری ہے۔ اس مہم کے تحت ڈائریکٹر زراعت عمران فراز (پلانٹ پروٹیکشن) لیہ کی زیر نگرانی ضلع بھر میں عملی سرگرمیاں انجام دی جا رہی ہیں۔ ڈائریکٹر زراعت (پلانٹ پروٹیکشن) لیہ عمران فراز کی جانب سے کسانوں کو ہدایت کی گئی ہے کہ وہ محکمہ زراعت پیسٹ وارننگ کی سفارشات پر مکمل عمل درآمد کریں، اپنے کھیتوں میں موجود کپاس کی چھڑیوں کو بروقت نکالیں، الٹ پلٹ کریں اور متاثرہ ملبہ تلف کریں تاکہ آئندہ کپاس کی فصل کو گلابی سنڈی کے حملے سے محفوظ رکھا جا سکے۔ انہوں نے کہا کہ کسانوں کا بروقت تعاون اس مہم کی کامیابی کے لیے ناگزیر ہے۔اسی سلسلے میں تحصیل چوبارہ میں ڈپٹی ڈائریکٹر پیسٹ وارننگ عبدالماجد نے ایکسکیویٹر کے ذریعے کپاس کی چھڑیوں کے الٹ پلٹ کا عملی مظاہرہ کیا۔ اس موقع پر کاشتکاروں نے خصوصی شرکت کی اور محکمہ زراعت کی کوششوں کو سراہا۔ جبکہ تحصیل لیہ میں ڈپٹی ڈائریکٹر زراعت (پلانٹ پروٹیکشن) لیہ وسیم الرحمٰن نے ٹریکٹرز کے ذریعے کپاس کی چھڑیوں کو الٹ پلٹ کروا کر کسانوں کو عملی طور پر اس مہم کی افادیت سے آگاہ کیا۔ انہوں نے کہا کہ کپاس کی باقیات کو بروقت تلف نہ کرنے کی صورت میں گلابی سنڈی آئندہ فصل کے لیے سنگین خطرہ بن سکتی ہے۔محکمہ زراعت کے مطابق ضلع لیہ کی تحصیل لیہ اور تحصیل چوبارہ میں یہ سرگرمیاں بھرپور طریقے سے جاری ہیں، جبکہ فیلڈ اسٹاف کسانوں کو موقع پر مکمل رہنمائی فراہم کر رہا ہے۔ بروقت اقدامات سے کپاس کی فصل کو محفوظ اور کسانوں کو خوشحال بنایا جا سکتا ہے۔
