لیہ(نمائندہ لیہ ٹی وی)پنجاب فوڈ اتھارٹی کی فوڈ سیفٹی ٹیم نے چوک اعظم لیہ میں کارروائی کرتے ہوئے ڈسٹری بیوٹر اور کریانہ سٹورز پر چھاپہ مارا، جہاں ناقص اور غیر معیاری گھی فروخت کیا جا رہا تھا۔ دوران انسپکشن گھی کے سیمپل فیل پائے گئے، جن میں وٹامن اے کی شدید کمی تھی۔ موقع پر 700 کلو گھی تلف کر دیا گیا جبکہ فوڈ بزنس مالکان کو 50 ہزار روپے کے جرمانے عائد کیے گئے۔ اس موقع پر ڈی جی پنجاب فوڈ اتھارٹی محمد عاصم جاوید نے کہا کہ صحت دشمن عناصر کے خلاف سخت کارروائیاں جاری رہیں گی اور فوڈ اتھارٹی قوانین کی خلاف ورزی کسی صورت برداشت نہیں کی جائے گی۔ ان کا مزید کہنا تھا کہ عوام خوراک کے متعلق کسی بھی شکایت کی صورت میں ہیلپ لائن 1223 پر رابطہ کریں۔ضلعی انتظامیہ نے واضح کیا کہ ناقص اور غیر معیاری خوراک بیچنے والوں کے خلاف بلاامتیاز کارروائی جاری رہے گی تاکہ عوام کو محفوظ اور معیاری خوراک فراہم کی جا سکے۔
