لاہور (لیہ ٹی وی) کرشنگ سیزن کے باوجود لاہور میں چینی کی قیمت میں مسلسل اضافہ دیکھنے میں آ رہا ہے۔ ذرائع کے مطابق چند روز کے دوران چینی کی قیمت میں 18 روپے فی کلو کا اضافہ ریکارڈ کیا گیا ہے۔
ڈیلرز ایسوسی ایشن کے مطابق چینی کی ایکس مل ریٹ 140 سے 143 روپے تک پہنچ چکا ہے، جبکہ دسمبر میں یہ ریٹ 125 روپے تھا۔ فروری کے لیے فیوچر ٹریڈ کا ریٹ 145 روپے مقرر کیا گیا ہے۔
صارفین کا کہنا ہے کہ چھوٹی دکانوں میں چینی 150 روپے فی کلو فروخت ہو رہی ہے، جس سے عام شہری شدید مشکلات کا شکار ہیں۔
ڈیلرز ایسوسی ایشن کے رہنما شیخ عاصم نے دعویٰ کیا ہے کہ چینی کی برآمد کی اجازت دے کر مصنوعی قلت پیدا کی گئی، جس سے قیمتوں میں اضافہ ہوا۔ انہوں نے حکومت کی نااہلی اور ملی بھگت کو اس بحران کی وجہ قرار دیا۔
شیخ عاصم نے خبردار کیا کہ اگر مافیا کو کنٹرول نہ کیا گیا تو رمضان کے دوران چینی کی قیمت میں مزید اضافے کا خدشہ ہے، جو عوام کی مشکلات میں مزید اضافہ کرے گا۔
