ملتان(لیہ ٹی وی)ایم ڈی اے انتظامیہ کا غیر منظور شدہ کمرشل تعمیرات اور رہائشی بلڈنگ کو بغیر منظوری کے کمرشل استعمال کے خلاف بڑی کارروائی ۔ایم ڈی اے انفورسمنٹ ٹیم نے ڈائریکٹر جنرل ایم ڈی اے رانا سلیم احمد خان کی ہدایت پر غیر منظور شدہ کمرشل تعمیرات کے خلاف کارروائی کرتے ہوئے
خانیوال روڈ نزد قادر پور راواں نزیر بھٹہ اور طارق بھٹہ کا غیر منظور شدہ کمرشل ہال، اکبر بھٹی اور اصغر بھٹی کا الائیڈ ہیلتھ سکول کے نام سے غیر منظور شدہ بلڈنگ،خانیوال روڈ نزد رشید آباد عاطف اور کاشف کا غیر منظور شدہ عارضی پیٹرول پمپ اور غوث الاعظم روڈ سیوڑا چوک پر GO کے نام سے غیر منظور شدہ پیٹرول پمپ کو سیل کر دیا گیا۔اس موقع پر ڈائریکٹر جنرل ایم ڈی اے رانا سلیم احمد خان نے گفتگو کرتے ہوئے کہا کہ غیر منظور شدہ تعمیرات کو کسی صورت برداشت نہیں کیا جائےگا۔غیر منظور شدہ تعمیرات کے خلاف بلاامتیاز ایکشن لیا جا رہا ہے۔
غیر منظور شدہ/ غیر قانونی بے ہنگم تعمیرات روڈز پر ٹریفک مسائل کا باعث بننے کے ساتھ ساتھ شہر کی خوبصورتی کو بھی خراب کرتی ہیں ڈائریکٹر جنرل ایم ڈی اے رانا سلیم احمد خان نے کہا ہے کہ تمام فیلڈ سٹاف اپنے اپنے علاقہ کی مسلسل نگرانی کریں اور نئی تعمیرات کے شروع ہوتے ہی مالکان کو ابتدائی مراحل میں ہی نقشہ منظور کروانے کے لئے نوٹس جاری کریں۔
