ملتان(لیہ ٹی وی) بصارت سے محروم افراد کی پہچان سفید چھڑی کے عالمی دن کے سلسلے میں مقامی میرج کلب میں ایک تقریب منعقدہ ہوئی جس میں نابینا مرد، خواتین اور بچوں کی بڑی تعداد نے شرکت کی۔سیکرٹری سروسز ساوتھ پنجاب انجینئیر امجد شعیب خان ترین بطور مہمان خصوصی تقریب میں شریک ہوئے
"وائس آف ویژیولی ایمپیرڈ پرسنز” کے چئیرمین غضنفر عباس،چیف ایڈوائزر ارشد محمود اور تنظیم کے پیٹرن انچیف و سابق صدر ہائیکورٹ بار اطہر شاہ بخاری بھی تقریب میں موجود تھے۔سیکرٹری سروسز ساوتھ پنجاب انجینئیر امجد شعیب خان ترین نے اس موقع پر اپنے خطاب میں کہا کہ سفید چھڑی کےدن کو منانے کا مقصد معاشرے کو نابینا افراد کی مشکلات سے آگاہ کرنا ہے۔ہر شہری پر فرض ہے کہ سفید چھڑی تھامے نابینا افراد سڑک پر چلتے نظر آئیں تو ان کی رہنمائی کی جائے۔ انہوں نے کہا وزیراعلی مریم نواز شریف کی جانب سے خصوصی افراد کے معاشی مسائل کے حل کے لئے ہمت کارڈ کا اجراء ایک انقلابی اقدام ہے۔
سیکرٹری سروسز نے کہا کہ جنوبی پنجاب سیکرٹریٹ بصارت سے محروم افراد کے مسائل کے حل کے لئے اپنا بھر پور کرادر ادا کرے گا۔انہوں نے بتایا کہ ٹیکنالوجی کے اس دور میں نابینا افراد کی مدد کے لئے سمارٹ شوز اور ڈیجیٹل اسٹک تیار کر لی گئی اور جنوبی پنجاب سیکرٹریٹ کے زیر اہتمام اگلے ماہ منعقد ہونیوالے سائنسی میلےمیں ان اشیاء کو بھی نمائش میں پیش کیا جائے گا۔انجینئر امجد شعیب خان ترین نے کہا کہ بصارت سے محروم افراد معاشرے کےانتہائی باہمت لوگ ہیں اور یہ صلاحیتوں کے حوالے سے کسی سے کم نہیں ہیں۔تقریب میں شریک تمام نابینا افراد میں سفید چھڑیاں اور تحائف تقسیم کئے گئے۔ نابینا افراد نے میوزک، آرٹ اور شاعری کے حوالے سے اپنے فن کا مظاہرہ بھی کیا۔بصارت محروم شاعرہ اسوہ عزیز نے اپنی لکھی نعت اور خانیوال سے تعلق رکھنے والی خدیجہ، نور فاطمہ اور عبیرہ نے ملی نغمہ پیش کیا۔حافظ امین نے تلاوت،حیدر علی نے نعت پیش کی، راج نے نظم اور نورالعین نے کمپئرنگ کی۔تقریب میں نئے عہدیداران سے حلف بھی لیا گیا۔
