صدر نے دہشت گردوں کے خلاف کامیاب کارروائیوں پر سیکیورٹی فورسز کو خراج تحسین پیش کیا

اسلام آباد(لیہ ٹی وی) صدر آصف علی زرداری نے ہفتہ کو بلوچستان کے اضلاع پشین اور ژوب میں دہشت گردوں کے خلاف کامیاب کارروائیوں پر سیکورٹی فورسز کو خراج تحسین پیش کیا۔ایوان صدر سے جاری ہونے والے ایک بیان میں صدر نے خوارج دہشت گردوں کے خلاف آپریشن کرنے پر سکیورٹی فورسز کی پیشہ وارانہ مہارت کو سراہا۔انہوں نے دہشت گردوں کے خلاف آپریشن جاری رکھنے کے عزم کا اظہار کرتے ہوئے کہا کہ ہم فتنہ الخوارج کے مکمل خاتمے تک کارروائیاں جاری رکھیں گے۔صدر زرداری نے کہا کہ سیکیورٹی فورسز دہشت گردوں کے خلاف بہادری سے لڑ رہی ہیں۔پوری قوم دہشت گردی کے خلاف لڑی جانے والی جنگ میں سیکیورٹی فورسز کے شانہ بشانہ کھڑی ہے۔