ملتان (لیہ ٹی وی)ملتان میں ٹریفک وارڈنز کا شہریوں پر تشدد، سی پی او ملتان صادق علی ڈوگر کا فوری ایکشن، چاروں وارڈنز معطل، انکوائری کا حکم ملتان میں ہیلمٹ نہ پہننے کے معاملے پر ٹریفک اہلکاروں اور موٹر سائیکل سواروں کے درمیان تلخ کلامی ہوئی جس پر موٹر سائیکل سواروں نے ویڈیو بنانا شروع کر دی جس پر ڈیوٹی پر موجود ٹریفک اہلکاروں نے موٹر سائیکل سواروں سے بدسلوکی کرتے ہوئے تشدد کیابدسلوکی کا واقعہ سامنے آنے پر سی پی او ملتان صادق علی ڈوگر نے واقعے کا فوری نوٹس لیتے ہوئے چاروں ٹریفک وارڈنز کو معطل کر دیا ہے۔معطل ہونے والے وارڈنز میں سینئر ٹریفک وارڈن محمد عمران، ٹریفک وارڈن محمد یاسین، ٹریفک وارڈن محمد عامر اور اسسٹنٹ ٹریفک وارڈن قیصر اقبال شامل ہیں۔ سی پی او ملتان نے چیف ٹریفک آفیسر سردار موارہن خان کو ہدایت کی ہے کہ وہ اس واقعے کی تفصیلی انکوائری کریں اور جلد از جلد رپورٹ پیش کریں تاکہ ذمہ دار اہلکار کے خلاف مزید کارروائی کی جا سکے۔ سی پی او ملتان صادق علی ڈوگر نے کہا کہ ہے پولیس فورس میں کسی بھی اہلکار کی جانب سے اختیارات سے تجاوز اور تشدد کو قطعی برداشت نہیں کیا جائے گا۔ انہوں نے کہا کہ ایسے واقعات پولیس کے وقار کو متاثر کرتے ہیں اور اس معاملے میں ملوث اہلکاروں کو سخت محکمانہ سزا دی جائے گی تاکہ آئندہ اس قسم کے واقعات کی روک تھام کی جا سکے۔ پولیس کا فرض عوام کی خدمت اور ان کے حقوق کا تحفظ ہے، اور کوئی بھی اہلکار اس اصول کی خلاف ورزی کرے گا تو اس کے خلاف سخت کارروائی کی جائے گی۔
