لیہ: لیہ فٹبال لیگ کے انتظامات جاری، ڈپٹی کمشنر آصف علی ڈوگر کا سپورٹس کمپلیکس کا دورہ۔ لیہ فٹبال لیگ کے انعقاد کے سلسلہ میں انتظامات تیزی سے جاری ہیں۔ ڈپٹی کمشنر آصف علی ڈوگر نے لیگ کے انتظامات کا جائزہ لینے کے لئے سپورٹس کمپلیکس کا دورہ کیا۔ ایڈیشنل ڈپٹی کمشنر سوشل سروسز خضر ظہور، اسسٹنٹ کمشنر لیہ زوہیب کریم اور ڈسٹرکٹ ناظر اطہر بیگ بھی ان کے ہمراہ تھے۔ اس موقع پر ڈسٹرکٹ سپورٹس آفیسر امتیاز احمد بھٹی نے ڈپٹی کمشنر کو لیہ فٹبال لیگ کے انتظامات، شریک ٹیموں، کھلاڑیوں کی رہائش، شائقین کے لئے بیٹھنے کے انتظامات اور فوڈ سٹریٹ کے حوالے سے تفصیلی بریفنگ دی۔ ڈپٹی کمشنر آصف علی ڈوگر نے متعلقہ افسران کو ہدایت کی کہ لیہ کے اس میگا سپورٹس ایونٹ کے لئے بہترین اور مثالی انتظامات یقینی بنائے جائیں۔ انہوں نے کہا کہ فٹبال لیہ کا مقبول کھیل ہے، لیگ کے دوران کھلاڑیوں، ٹیموں اور شائقین کو بہترین سہولیات فراہم کی جائیں اور ایونٹ کو کامیاب بنانے کے لئے تمام ضروری اقدامات بروئے کار لائے جائیں۔ انہوں نے مزید ہدایت کی کہ لیہ فٹبال لیگ کو سپورٹس کیلنڈر کا مستقل حصہ بنانے کے لئے اقدامات کئے جائیں تاکہ ضلع میں کھیلوں کے فروغ اور نوجوانوں کو مثبت سرگرمیوں کے مواقع فراہم کرنے کا سلسلہ جاری رہے۔
