لیہ: الیکشن کمیشن آف پاکستان کی ہدایات کی روشنی میں گورنمنٹ ٹیکنیکل کالج آف ٹیکنالوجی برائے خواتین لیہ میں خواتین میں ووٹ کی اہمیت، حقِ رائے دہی اور انتخابی عمل سے متعلق شعور اجاگر کرنے کے لیے ووٹر آگاہی تقریب کا انعقاد کیا گیا۔تقریب کی صدارت ضلعی الیکشن کمشنر لیہ ظفراللہ خان نے کی جبکہ طالبات کی بڑی تعداد نے شرکت کی۔ اس موقع پر ضلعی الیکشن کمشنر نے خطاب کرتے ہوئے کہا کہ ووٹ کاسٹ کرنا ہر شہری کا بنیادی جمہوری حق ہے اور خواتین بھی اپنے حقِ رائے دہی کے استعمال کے ذریعے ملک کی ترقی اور جمہوری استحکام میں اہم کردار ادا کر سکتی ہیں۔انہوں نے کہا کہ ہر اہل شہری کو اپنا ووٹ رجسٹرڈ کروانے، انتخابی فہرست میں ووٹ کی تصدیق اور انتخابات کے دوران اپنے حقِ رائے دہی کے استعمال کو یقینی بنانا چاہیے۔ انہوں نے طالبات سے کہا کہ وہ ووٹ کی اہمیت اور انتخابی عمل سے متعلق آگاہی کا پیغام اپنے گھروں اور معاشرے تک پہنچائیں۔ تقریب کے دوران طالبات کو ووٹر رجسٹریشن، شناختی کارڈ کی بنیاد پر ووٹ کی تصدیق اور پولنگ کے روز ووٹ کاسٹ کرنے کے بنیادی طریقہ کار کے بارے میں آگاہی فراہم کی گئی۔
