ارفع مریم کی ڈی جی خان بورڈ میں پہلی، طوبیٰ ندیم کی تیسری پوزیشن، گورنمنٹ گریجویٹ کالج کوٹ سلطان میں تقریب

لیہ :ڈیرہ غازی خان بورڈ کے انٹرمیڈیٹ سالانہ امتحانات میں نمایاں پوزیشنیں حاصل کرنے والی گورنمنٹ گریجویٹ کالج برائے خواتین کوٹ سلطان کی ہونہار طالبات کے اعزاز میں سادہ مگر پروقار تقریب کا انعقاد کیا گیا ، جس کے مہمانِ خصوصی صدر پریس کلب کوٹ سلطان سید عابد حسین فاروقی تھے۔ تقریب میں جنرل سیکرٹری پریس کلب ناصر حسین بریال، سینئر نائب صدر سجاد منجوٹھہ ، نائب صدر نور یزدانی سمیت کالج کی پرنسپل نازیہ شاد اور اساتذہ نے شرکت کی ۔ کالج کی ہونہار طالبہ ارفع مریم نے 1200 میں سے 1164 نمبر حاصل کر کے ڈیرہ غازی خان بورڈ میں پہلی جبکہ طوبیٰ ندیم نے تیسری پوزیشن حاصل کرکے نہ صرف ادارے بلکہ علاقے ، شہر اور ضلع کا نام بھی روشن کیا ۔ اس شاندار کامیابی پر طالبات کا پرتپاک استقبال کیا گیا اور ان پر پھولوں کی پتیاں نچھاور کر کے حوصلہ افزائی کی گئی ۔ تقریب سے خطاب کرتے ہوئے پرنسپل نازیہ شاد نے کہا کہ طالبات کی یہ کامیابی ان کی مسلسل محنت ، اساتذہ کی رہنمائی اور والدین کی دعاؤں کا نتیجہ ہے۔ تعلیمی میدان میں نمایاں پوزیشنیں حاصل کرنا ادارے کے لیے باعثِ فخر ہے ۔ انہوں نے کہا کہ وہ گزشتہ تقریباً پانچ سال سے کالج میں بطور پرنسپل جبکہ مجموعی طور پر گیارہ سال سے اس ادارے میں اپنی خدمات سر انجام دے رہی ہیں ۔ اس وقت کالج میں تقریباً پندرہ سو طالبات زیرِ تعلیم ہیں ، جنہیں معیاری تعلیم کی فراہمی اور ان کی صلاحیتوں کو نکھارنے کے لیے بھرپور کوششیں جاری ہیں ۔ قبل ازیں 2025 کے سالانہ رزلٹ میں بھی ادارے کی طالبہ رابعہ بصری نے بورڈ میں تیسری پوزیشن حاصل کی تھی ۔ اس موقع پر صدر پریس کلب کوٹ سلطان سید عابد حسین فاروقی نے کہا کہ طالبات کی نمایاں کامیابیاں اس بات کا ثبوت ہیں کہ محنت ، لگن اور معیاری تعلیم اور رہنمائی سے کامیابی کی منازل طے کی جا سکتی ہیں ۔ انہوں نے کہا کہ تعلیمی میدان میں پوزیشنیں حاصل کرنے والی طالبات نہ صرف اپنے والدین بلکہ اساتذہ اور پورے علاقے کے لیے باعثِ فخر ہیں ۔ ایسی ہونہار طالبات کی حوصلہ افزائی سے دیگر طالبات کو بھی آگے بڑھنے اور اعلیٰ تعلیمی اہداف حاصل کرنے کا جذبہ ملتا ہے ۔ تقریب کے اختتام پر طالبات کی شاندار تعلیمی کارکردگی کو سراہا گیا اور ان کے روشن مستقبل کے لیے نیک تمناؤں کا اظہار کیا گیا ۔