لیہ: ڈپٹی کمشنر آصف علی ڈوگر نے مریم نواز سپورٹس ایرینا کا تفصیلی دورہ کیا اور جاری تعمیراتی و ترقیاتی کاموں کا معائنہ کیا۔ اس موقع پر انہوں نے منصوبے کے مختلف حصوں میں جاری سول ورکس، تعمیراتی رفتار اور معیار کا تفصیلی جائزہ لیا۔ انہوں نے منصوبے کی تکمیل کے مقررہ ٹائم لائن کے مطابق پیش رفت کا بھی جائزہ لیا۔ ڈپٹی کمشنر نے متعلقہ پراجیکٹ ٹیم اور کنٹریکٹرز کو ہدایت کی کہ تعمیراتی کام میں معیار کو ہر صورت یقینی بنایا جائے۔ انہوں نے کہا کہ منصوبے کی بروقت تکمیل کے لیے تمام دستیاب وسائل بروئے کار لائے جائیں۔ ڈپٹی کمشنر نے کہا کہ مریم نواز سپورٹس ارینا شہریوں اور بچوں کے لئے یکساں تفریح کے مواقع فراہم کرنے کا بہترین مقام ثابت ہوگا۔ انہوں نے کہا کہ اوپن ایئر کیفے ٹیریا سپورٹس ارینا میں ایک خوشگوار اضافہ ہے۔ دریں اثناء ڈپٹی کمشنر آصف علی ڈوگر نے جنرل بس سٹینڈ کی تعمیر و تزئین و آرائش کے جاری کام کا بھی معائنہ کیا اور تعمیراتی کام کے معیار کا جائزہ لیا۔ ڈپٹی کمشنر نے ہدایت کی کہ جنرل بس سٹینڈ کی تعمیر کو جلد مکمل کیا جائے۔ انہوں نے ہدایت کی کہ سیورج کے نظام کو پلان کے مطابق فعال کیا جائے تاکہ صفائی کو برقرار رکھا جا سکے۔ اس موقع پر متعلقہ افسران بھی ان کے ہمراہ تھے۔
