لیہ: ایڈیشنل ڈپٹی کمشنر جنرل شبیر احمد ڈوگر کا ٹی ایچ کیو نواز شریف تھل ہسپتال کا اچانک دورہ۔ ایڈیشنل ڈپٹی کمشنر نے ہسپتال کے مختلف حصوں کا معائنہ کیا اور صفائی ستھرائی کے انتظامات کا جائزہ لیا۔ انہوں نے ڈاکٹرز اور سٹاف کی حاضری چیک کی اور میڈیسن سٹور میں ادویات کی دستیابی کا جائزہ لیا۔ ایڈیشنل ڈپٹی کمشنر جنرل شبیر احمد ڈوگر نے کہا کہ صحت سہولیات اور سروسز کی فراہمی حکومت پنجاب کی اولین ترجیح ہے اور اس پر کوئی سمجھوتا نہیں کیا جا سکتا۔ انہوں نے کہا کہ مریضوں اور لواحقین سے خوش اخلاقی سے پیش آیا جائے اور اداروں پر عوام کے اعتماد کو مزید مضبوط بنایا جائے۔ انہوں نے اس موقع پر وارڈز میں زیر علاج مریضوں کی خیریت دریافت کی اور سہولیات بارے بھی استفسار کیا۔ دریں اثناء ایڈیشنل ڈپٹی کمشنر جنرل نے شہر کے مختلف حصوں میں ستھرا پنجاب ایجنسی کی ٹیموں کا معائنہ کیا اور جاری صفائی آپریشن کا جائزہ لیا۔ انہوں نے ورکرز کی حاضری چیک کی اور ضروری ہدایات جاری کیں۔
