لیہ میں اشیائے خوردونوش کے نئے سرکاری نرخ مقرر، تازہ ریٹ لسٹ جاری، خلاف ورزی پر کارروائی کا فیصلہ روٹی 14، نان 20، دودھ 160، مٹن 1800 اور بیف 1000 روپے فی کلو مقرر، دکانداروں کو ریٹ لسٹ نمایاں جگہ پر آویزاں کرنے کی ہدایت

لیہ:ڈپٹی کمشنر/کنٹرولر پرائسز اینڈ سپلائز کی ہدایت پر ضلع لیہ میں اشیائے خوردونوش کے نئے سرکاری نرخ مقرر کرتے ہوئے تازہ ریٹ لسٹ جاری کر دی گئی ہے۔ تاجر تنظیموں کی مشاورت سے اشیائے ضروریہ کی قیمتوں کا ازسرنو تعین کیا گیا ہے جن کا اطلاق فوری طور پر ہوگا۔ اس سلسلہ میں ایڈیشنل ڈپٹی کمشنر ہیڈ کوارٹر محمد اویس سرور کی زیر صدارت اجلاس منعقد ہوا جس میں مختلف اشیائے ضروریہ کے نرخ باہمی مشاورت سے مقرر کیے گئے۔جاری کردہ نرخ نامہ کے مطابق چاول کائنات (نیا) 310 روپے فی کلو، چاول کائنات (پرانا) 340 روپے فی کلو، چاول (اری 6) 120 روپے فی کلو، دال چنا (موٹی) 240 روپے فی کلو، دال چنا (باریک) 222 روپے فی کلو، سفید چنا (موٹا) 260 روپے فی کلو، سفید چنا (باریک) 220 روپے فی کلو، دال مسور (موٹی) 225 روپے فی کلو، دال ماش (دھلی ہوئی) 425 روپے فی کلو، دال ماش (غیر دھلی ہوئی) 390 روپے فی کلو، دال مونگ (دھلی ہوئی) 265 روپے فی کلو جبکہ بیسن 235 روپے فی کلو مقرر کیا گیا ہے۔اسی طرح روٹی (100 گرام) 14 روپے، نان سادہ (120 گرام) 20 روپے، دودھ 160 روپے فی لیٹر، دہی 180 روپے فی کلو، گوشت چھوٹا (مٹن) 1800 روپے فی کلو اور گوشت بڑا (بیف) 1000 روپے فی کلو مقرر کیا گیا ہے۔ چینی سفید، آٹا تھیلا 10 کلوگرام، آٹا تھیلا 20 کلوگرام اور گھی/کوکنگ آئل حکومت کی مقررہ پالیسی کے مطابق فروخت ہوں گے جبکہ برائلر گوشت، انڈے اور سبزی و پھل کے نرخ مارکیٹ کمیٹی کے جاری کردہ نرخ نامہ کے مطابق ہوں گے۔ایڈیشنل ڈپٹی کمشنر محمد اویس سرور نے اس موقع پر کہا کہا کہ اشیائے ضروریہ کی مقررہ نرخوں پر دستیابی اور ناجائز منافع خوری کی روک تھام ضلعی انتظامیہ کی ترجیحات میں شامل ہے۔ انہوں نے متعلقہ افسران کو ہدایت کی کہ نئی ریٹ لسٹ پر عملدرآمد کے لیے مارکیٹوں کی باقاعدگی سے نگرانی کی جائے اور تمام دکاندار سرکاری نرخ نامہ نمایاں جگہ پر آویزاں کریں۔ انہوں نے مزید کہا کہ مقررہ نرخوں سے زائد قیمت وصول کرنے والوں کے خلاف قانون کے مطابق کارروائی عمل میں لائی جائے تاکہ شہریوں کو ریلیف کی فراہمی یقینی بنائی جا سکے۔اجلاس میں ڈی او انڈسٹری عاشق حسین، سیکرٹری مارکیٹ کمیٹی سید عمران شہزاد،اسسٹنٹ ڈائریکٹر ماحولیات سویرا حسن،ممبران کمیٹی صدر انجمن تاجران اظہر ہانس،محمد عمر شاکر،مہدی حیات،ودیگر موجود تھے۔