لیہ : وزیراعلیٰ پنجاب مریم نواز شریف کے وژن کے مطابق دیہی خواتین کو معاشی طور پر خودمختار بنانے اور باعزت روزگار کی فراہمی کے لیے چیف منسٹر لائیو سٹاک اثاثہ جات پروگرام کے تحت تحصیل کروڑ لعل عیسن میں مستحق خواتین میں 97 مویشی تقسیم کر دیے گئے۔اس سلسلے میں منعقدہ تقریب میں سابق ممبران اسمبلی صاحبزادہ فیض الحسن سواگ، ملک عبدالشکور سواگ، ملک عثمان علی اولکھ، اسسٹنٹ کمشنر کروڑ اصغر علی چیمہ، ڈائریکٹر لائیو سٹاک ڈی جی خان ڈاکٹر غلام نظام الدین، ایڈیشنل ڈائریکٹر لائیو سٹاک ڈاکٹر طارق گدارہ، محکمہ لائیو سٹاک کے افسران اور مستحق خواتین نے شرکت کی۔تقریب کے دوران 50 ساہیوال نسل کی گائیں، 30 چولستانی نسل کی گائیں اور 17 بھینسیں مستحق خواتین میں تقسیم کی گئیں۔مقررین نے کہا کہ وزیراعلیٰ پنجاب مریم نواز شریف نے جنوبی پنجاب کی مستحق خواتین کو معاشی طور پر مضبوط بنانے کے لیے اہم فلاحی منصوبہ شروع کیا ہے، جس کے تحت بیوہ، مطلقہ اور کم آمدن خواتین کو مفت مویشی فراہم کیے جا رہے ہیں تاکہ وہ جانوروں کی پرورش اور دودھ کی پیداوار کے ذریعے اپنے خاندانوں کی کفالت بہتر انداز میں کر سکیں۔انہوں نے کہا کہ یہ منصوبہ خواتین کو باعزت روزگار کی فراہمی کے ساتھ دیہی معیشت کے استحکام میں بھی اہم کردار ادا کرے گا۔ مویشیوں کی تقسیم کے عمل میں شفافیت اور میرٹ کو خصوصی اہمیت دی جا رہی ہے تاکہ حقیقی مستحق خواتین اس سہولت سے فائدہ اٹھا سکیں۔ اس اقدام سے جنوبی پنجاب کی خواتین کو معاشی خودمختاری حاصل کرنے کے بہتر مواقع میسر آئیں گے






