لیہ (نمائندہ جنگ)لیہ پولیس کے زیر اہتمام منشیات کے خلاف آگاہی سیمینار اور واک کا انعقاد کیا گیا۔ سیمینار میں ڈی پی او لیہ حسن جاوید بھٹی، ڈی ایس پی صدر اور دیگر مقررین نے خصوصی شرکت کی اور شرکاء کو آگاہی لیکچرز دیے۔ اس موقع پر کالج اساتذہ اور طلباء کی کثیر تعداد بھی موجود تھی۔ڈی پی او حسن جاوید بھٹی نے خطاب کرتے ہوئے کہا کہ ویپ، آئس اور دیگر منشیات معاشرتی ناسور ہیں جو نوجوان نسل کے مستقبل کو تباہ کر رہی ہیں۔ لیہ پولیس منشیات کے اس ناسور کو جڑ سے اکھاڑ پھینکنے کے لیے ہر ممکن اقدامات کر رہی ہے۔ انہوں نے کہا کہ تعلیمی اداروں، اساتذہ، والدین اور معاشرے کے تمام طبقات کو منشیات کے خاتمے کے لیے اپنا مؤثر کردار ادا کرنا ہوگا۔مقررین نے کہا کہ نوجوان نسل کو منشیات سے محفوظ رکھنے اور تعلیمی اداروں میں منشیات کے بڑھتے ہوئے رجحان کی روک تھام کے لیے شعور و آگاہی پیدا کرنا وقت کی اہم ضرورت ہے۔ سیمینار کے اختتام پر ڈی پی او حسن جاوید بھٹی کی قیادت میں منشیات کے خلاف آگاہی واک بھی نکالی گئی، جس میں شرکاء نے منشیات سے پاک، صحت مند اور محفوظ معاشرے کی تشکیل کے عزم کا اظہار کیا۔












