لیہ: لیہ پولیس کے زیر اہتمام پوسٹ گریجوایٹ کالج چوک اعظم میں ٹریفک قوانین اور منشیات کے خلاف آگاہی سیمینار اور واک کا انعقاد کیا گیا۔ ڈی پی او لیہ حسن جاوید بھٹی کی زیر صدارت منعقدہ سیمینار میں طلباء و طالبات کو آگاہی لیکچر دیا گیا۔ڈی پی او حسن جاوید بھٹی نے خطاب کرتے ہوئے کہا کہ منشیات ایک ناسور ہے جو نوجوان نسل کا مستقبل تباہ کر رہی ہے۔ طلباء خود بھی منشیات سے دور رہیں اور اپنے اردگرد کے افراد کو بھی اس برائی سے بچانے میں اپنا کردار ادا کریں۔ انہوں نے کہا کہ ٹریفک قوانین پر عملدرآمد کرکے قیمتی انسانی جانوں کو حادثات کی نذر ہونے سے بچایا جا سکتا ہے۔اس موقع پر ڈی پی او حسن جاوید بھٹی، ڈی ایس پی ٹریفک اور دیگر افسران نے طلباء و طالبات میں مفت ہیلمٹ تقسیم کیے۔ مقررین نے کہا کہ منشیات کے خاتمے اور ٹریفک قوانین کی پاسداری کے لیے پولیس کے ساتھ اساتذہ، والدین اور معاشرے کے تمام طبقات کو اپنا مثبت کردار ادا کرنا ہوگا۔سیمینار کے اختتام پر آگاہی واک کا انعقاد بھی کیا گیا جس میں طلباء، اساتذہ اور پولیس افسران نے شرکت کی۔ شرکاء نے منشیات کے خلاف اور ٹریفک قوانین سے متعلق آگاہی کے بینرز اور فلیکس اٹھا رکھے تھے۔






