لیہ: ڈسٹرکٹ پولیس آفیسر لیہ حسن جاوید بھٹی نے میڈیا ٹاک کرتے ہوئے کہا ہے کہ ضلع لیہ میں جرائم کی روک تھام اور عوام کے جان و مال کے تحفظ کے لیے مؤثر اقدامات کیے جا رہے ہیں۔ 8 سے 17 نومبر 2026 کے دوران جرائم کے مختلف اہم شعبوں میں گزشتہ سال کے اسی عرصے کے مقابلے میں نمایاں بہتری سامنے آئی ہے۔ انہوں نے بتایا کہ گزشتہ سال ان دس روز کے دوران 36 مقدمات درج ہوئے تھے جبکہ رواں سال اسی عرصے میں 17 مقدمات درج کیے گئے، اس طرح مقدمات کی تعداد میں 19 کی کمی ریکارڈ کی گئی۔ڈی پی او نے بتایا کہ گزشتہ دس روز کے دوران پولیس نے 6 جرائم پیشہ گینگز کے 14 ارکان کو گرفتار کرکے ان سے تقریباً ساڑھے 16 لاکھ روپے مالیت کا مالِ مسروقہ برآمد کیا جبکہ موٹر سائیکل چوری، مویشی چوری اور نقب زنی سمیت 28 مقدمات ٹریس کیے گئے۔ جرائم پیشہ عناصر کے خلاف کارروائیوں کے دوران مزید مشتبہ ملزمان کو گرفتار کرکے تفتیش کی گئی اور ان کی نشاندہی پر مختلف مقامات پر چھاپے مارے گئے۔حسن جاوید بھٹی نے کہا کہ پولیس کی جانب سے منشیات کے خلاف آگاہی مہم بھی جاری ہے، جس کے تحت سکولوں، کالجوں اور یونیورسٹیوں میں طلبہ کو منشیات، ای سگریٹس اور ویپنگ کے نقصانات سے آگاہ کیا جا رہا ہے۔ ٹریفک قوانین کی پابندی اور روڈ سیفٹی کے حوالے سے بھی آگاہی دی جا رہی ہے جبکہ شہریوں میں مفت ہیلمٹ تقسیم کرنے کا سلسلہ بھی جاری ہے۔انہوں نے کہا کہ موسم سرما میں دھند کے باعث حادثات کے خدشات بڑھ جاتے ہیں، اس لیے شہریوں کو ٹریفک قوانین پر عملدرآمد، ہیلمٹ کے استعمال اور احتیاطی تدابیر اختیار کرنے کی تلقین کی جا رہی ہے۔ ڈی پی او نے مزید کہا کہ جرائم کی روک تھام کے لیے نائٹ پٹرولنگ، روزانہ کی بنیاد پر سرچ آپریشنز اور پولیس کارکردگی کی مسلسل مانیٹرنگ کی جا رہی ہے۔ تفتیش کے معیار کو بہتر بنانے کے لیے ایس پی انویسٹی گیشن اور متعلقہ افسران کے ہمراہ تھانوں کے دورے، تفتیشی افسران سے میٹنگز اور اہم مقدمات کی پیش رفت کا جائزہ بھی لیا جا رہا ہے۔انہوں نے کہا کہ لیہ پولیس کی اولین ترجیح جرائم کا خاتمہ، عوام کے جان و مال کا تحفظ اور شہریوں کو محفوظ ماحول فراہم کرنا ہے







