لیہ: ڈی ایس پی پٹرولنگ ضلع لیہ راؤ عمر فاروق نے نومبر 2026 کی ابتدائی 15 روزہ کارکردگی کے حوالے سے بتایا ہہ کہ پٹرولنگ پولیس ضلع لیہ عوام کے جان و مال کے تحفظ، جرائم کے انسداد اور شاہرات پر محفوظ و رواں ٹریفک کی فراہمی کے لیے مؤثر اقدامات کر رہی ہے۔انہوں نے بتایا کہ رواں ماہ کے ابتدائی 15 روز کے دوران اوورلوڈنگ، اوور اسپیڈنگ، غیر قانونی اسلحہ، منشیات اور دیگر جرائم کے خلاف کارروائی کرتے ہوئے مجموعی طور پر 14 مقدمات درج کیے گئے جبکہ ٹریفک قوانین کی خلاف ورزی پر 3100 ڈرائیوروں کے چالان کیے گئے۔ ضلع بھر کی 8 پٹرولنگ پوسٹس کے ذریعے دوران سفر 104 شہریوں کو مختلف نوعیت کی مدد فراہم کی گئی۔ڈی ایس پی پٹرولنگ راؤ عمر فاروق نے مزید بتایا کہ جدید ای پولیس ایپ (E-Police App) کے ذریعے چیکنگ کے دوران 8 اشتہاری مجرمان اور عدالتی مفروروں کو گرفتار کیا گیا اسی طرح بغیر رجسٹریشن اور قانونی دستاویزات کے 104 موٹرسائیکلیں قبضے میں لے کر متعلقہ تھانوں میں بند کی گئیں۔ اس کے علاوہ ضلع بھر میں 15 عارضی و مستقل تجاوزات کا خاتمہ بھی کیا گیا۔راؤ عمر فاروق نے کہا کہ ٹریکٹر ٹرالیوں، لوڈرز، ریڑھیوں اور دیگر سست رفتار گاڑیوں پر ریفلیکٹرز اور بیک لائٹس کا استعمال لازمی بنایا جائے کیونکہ دھند اور اندھیرے میں بغیر لائٹس سفر کرنا کسی بڑے حادثے کا سبب بن سکتا ہے۔ گاڑی خراب ہونے یا کسی ہنگامی صورتحال کی صورت میں اسے فوری طور پر سڑک سے ہٹا کر محفوظ مقام پر کھڑا کیا جائے، ہیزرڈ لائٹس آن کی جائیں اور وارننگ ٹرائی اینگل کا استعمال کیا جائے۔ڈی ایس پی پٹرولنگ نے کہا کہ پٹرولنگ پولیس سموگ کے دوران شاہراہوں پر مسلسل گشت کر رہی ہے اور شہریوں کی رہنمائی، حفاظت اور بروقت مدد کے لیے ہمہ وقت موجود ہے شہری ٹریفک قوانین پر عملدرآمد کرتے ہوئے اپنی اور دوسروں کی جانوں کے تحفظ کو یقینی بنائیں۔







