لیہ: لیہ تونسہ پل اپروچ روڈ پر بڑی پیش رفت، لینڈ ایکوزیشن کے لیے رقم منتقل۔ تفصیلات کے مطابق لیہ تونسہ پل اپروچ روڈ کی تعمیر کے منصوبے میں اہم پیش رفت سامنے آئی ہے، نیشنل ہائی ویز اتھارٹی (NHA) کی جانب سے لینڈ ایکوزیشن کے لیے رقم منتقل کر دی گئی۔ اس سلسلہ میں پراجیکٹ ڈائریکٹر نیشنل ہائی ویز اتھارٹی نے چیک ڈپٹی کمشنر لیہ آصف علی ڈوگر کے حوالے کیا۔ اس موقع پر گفتگو کرتے ہوئے ڈپٹی کمشنر آصف علی ڈوگر نے کہا کہ لیہ تونسہ پل اپروچ روڈ کی تعمیر سے علاقے میں آمدورفت کے نظام میں نمایاں بہتری آئے گی اور عوام کو سفری سہولیات میسر ہوں گی۔ انہوں نے کہا کہ منصوبے کی تکمیل سے نشیبی علاقوں میں دریائی کٹاؤ کی روک تھام میں بھی مدد ملے گی۔ ڈپٹی کمشنر نے کہا کہ نیشنل ہائی ویز اتھارٹی کی جانب سے اپروچ روڈ کے لیے لینڈ ایکوزیشن کی رقم منتقل کر دی گئی ہے، جس کے بعد منصوبے کی راہ میں ایک اہم مرحلہ مکمل ہوگیا ہے۔ انہوں نے بتایا کہ اپروچ روڈ میں آنے والی اراضی کے مالکان کو جلد معاوضہ جات کی ادائیگی کا عمل شروع کر دیا جائے گا۔ انہوں نے متعلقہ افسران کو لینڈ ایکوزیشن اور معاوضہ جات کی ادائیگی کے عمل کو شفاف اور مقررہ ضوابط کے مطابق تیزی سے مکمل کرنے کی ہدایت بھی کی۔
