لیہ: یونیورسٹی آف لیہ حافظ آباد کیمپس میں ضلع لیہ میں پہلی مرتبہ ایم ڈی کیٹ امتحان خوش اسلوبی، پرامن اور بہترین انتظامات کے ساتھ اختتام پذیر ہوگیا۔ڈپٹی کمشنر آصف علی ڈوگر نے امتحانی مرکز کا دورہ کرکے امتحانی عمل اور انتظامات کا تفصیلی جائزہ لیا۔ اس موقع پر وائس چانسلر یونیورسٹی آف لیہ پروفیسر ڈاکٹر زبیر ابوبکر،اے ڈی سی محمد اویس سرور، ڈپٹی ڈائریکٹر کالجز ذوالفقار حیدری،ڈی ایچ او ڈاکٹر غلام محی الدین، سی ای او تعلیم ڈاکٹر محمد قیوم، ڈی ای او گل شیر اور دیگر متعلقہ افسران بھی موجود تھے۔ ڈپٹی کمشنر نے امتحانی مرکز میں طلبہ کے بیٹھنے کے انتظامات، امیدواروں کی سہولت کے لیے قائم کاؤنٹرز، پارکنگ، ٹریفک، پینے کے پانی اور دیگر بنیادی سہولیات کا جائزہ لیا۔ انہوں نے بائیومیٹرک تصدیق، موبائل فون جمع کرانے کے کاؤنٹرز، جیمرز اور امتحانی مرکز میں ڈیوٹی پر مامور افسران و اہلکاروں کی ذمہ داریوں کا بھی معائنہ کیا۔ ڈپٹی کمشنر نے کہا کہ ایم ڈی کیٹ کے دوران امیدواروں کو پرسکون، محفوظ اور سازگار ماحول کی فراہمی کے لیے تمام متعلقہ اداروں نے مربوط انداز میں فرائض انجام دیے اور تمام انتظامات کی مسلسل نگرانی کی گئی۔ انہوں نے کہا کہ امتحانی عمل کے دوران سکیورٹی، ٹریفک، پارکنگ، بجلی، پینے کے پانی اور طبی سہولیات سمیت تمام ضروری انتظامات کو یقینی بنایا گیا۔ امیدواروں کے ساتھ آنے والے والدین اور عزیزوں کے لیے بھی بیٹھنے، پینے کے پانی اور دیگر ضروری سہولیات کا خصوصی انتظام کیا گیا جبکہ کھانے پینے سمیت ضروری اشیاء کی فراہمی بھی یقینی بنائی گئی۔ ایم ڈی کیٹ کے موقع پر ریسکیو 1122 کی 3 ایمبولینسز، 8 موٹر بائیکس اور ایک فائر وہیکل سمیت 20 اہلکار تعینات رہے۔ ڈسٹرکٹ ایمرجنسی آفیسر ریسکیو 1122 ڈاکٹر سجاد کی نگرانی میں امدادی ٹیموں نے ہنگامی صورتحال سے نمٹنے کے لیے فرائض انجام دیے۔ محکمہ صحت کی جانب سے میڈیکل کیمپ قائم کیا گیا جبکہ فوڈ اتھارٹی نے بھی امتحانی مرکز پر کیمپ قائم کرکے اشیائے خورونوش کے معیار کی نگرانی کی۔ سول ڈیفنس کے رضاکاروں نے بھی اپنی ذمہ داریاں انجام دیں۔ ایم ڈی کیٹ کے موقع پر پولیس، ایلیٹ پولیس اور ٹریفک پولیس کے 250 افسران و اہلکار سکیورٹی اور ٹریفک کے انتظامات پر مامور رہے۔ ڈپٹی کمشنر نے سکیورٹی انتظامات پر اطمینان کا اظہار کرتے ہوئے کہا کہ تمام متعلقہ اداروں کی مشترکہ کاوشوں سے ایم ڈی کیٹ کا امتحانی عمل منظم اور پرامن ماحول میں مکمل ہوا۔ڈپٹی کمشنر نے بہترین انتظامات پر تمام متعلقہ افسران کو شاباش دی۔
