لیہ: پیر جگی شریف کے نواحی علاقے چک نمبر 170 ٹی ڈی اے میں گھریلو تنازع کے دوران مبینہ طور پر بہو نے اپنی ساس کے چہرے پر تیزاب پھینک دیا، جس کے نتیجے میں خاتون کا چہرہ تقریباً 50 فیصد جھلس گیا۔متاثرہ خاتون کلثوم بی بی زوجہ واحد بخش بلوچ نے واقعے کے خلاف قانونی کارروائی کے لیے تھانہ پیر جگی سے رجوع کرلیا۔ پولیس کو دی گئی درخواست میں متاثرہ خاتون نے مؤقف اختیار کیا کہ گھریلو اختلافات کے دوران تلخ کلامی کے بعد مبینہ طور پر بہو نے اس کے چہرے پر تیزاب پھینک دیا۔واقعے کے بعد متاثرہ خاتون کو طبی امداد فراہم کی گئی۔ تھانہ پیر جگی پولیس نے متاثرہ خاتون کی درخواست پر مبینہ ملزمہ کے خلاف قانونی کارروائی شروع کردی ہے۔ پولیس کے مطابق واقعے کے تمام پہلوؤں کی تحقیقات کی جارہی ہیں۔
