لیہ: جنرل ہسپتال لیہ میں ڈاکٹروں کی رہائش گاہوں کی تعمیر شروع۔ وزیر اعلیٰ پنجاب مریم نواز شریف کے احکامات پر جنرل ہسپتال منصوبے پر کام کی رفتار مزید تیز، ڈپٹی کمشنر آصف علی ڈوگر کا تعمیراتی کام کا جائزہ۔ وزیر اعلیٰ پنجاب مریم نواز شریف کے احکامات کی روشنی میں جنرل ہسپتال لیہ کے منصوبے پر کام کی رفتار مزید تیز کر دی گئی ہے۔ جنرل ہسپتال میں ڈاکٹروں کی رہائش گاہوں کی تعمیر کا کام بھی شروع کر دیا گیا ہے۔ ڈپٹی کمشنر لیہ آصف علی ڈوگر نے جنرل ہسپتال کا دورہ کیا اور ڈاکٹروں کی رہائش گاہوں سمیت جاری تعمیراتی کام کا تفصیلی جائزہ لیا۔ چیف ایگزیکٹو آفیسر ہیلتھ ڈاکٹر شاہد ریاض بھی ان کے ہمراہ تھے۔ اس موقع پر متعلقہ حکام نے انہیں تعمیراتی پیش رفت، کام کی رفتار اور منصوبے کے مختلف امور بارے بریفنگ دی۔ ڈپٹی کمشنر آصف علی ڈوگر نے متعلقہ حکام کو تعمیراتی کام مقررہ معیار کے مطابق تیزی سے مکمل کرنے کی ہدایت کرتے ہوئے کہا کہ جنرل ہسپتال لیہ کی تکمیل حکومت پنجاب کی ترجیحات میں شامل ہے۔ انہوں نے تعمیراتی کام کی مسلسل مانیٹرنگ اور معیار پر خصوصی توجہ دینے کی بھی ہدایت کی۔ انہوں نے کہا کہ جنرل ہسپتال اور ڈاکٹروں کے لئے رہائش کا قیام علاقہ کے لئے ایک بہت بڑی نعمت ہے۔ صحت کی بہترین سہولیات ہر فرد کا بنیادی حق ہے اور وزیر اعلیٰ پنجاب مریم نواز شریف اس سلسلہ میں عملی اقدامات اٹھا رہی ہیں۔ انہوں نے کہا کہ جنرل ہسپتال سٹیٹ آف دی آرٹ ہسپتال ہے جس میں جدید طبی سہولیات، مشینری، ادویات اور قابل ڈاکٹرز کی سہولت میسر آئے گی۔
