لیہ: وزیراعلیٰ پنجاب مریم نواز شریف کے احکامات پر شہریوں کے مسائل ان کی دہلیز پر حل کرنے کے لیے بہادر ڈیجیٹل لائبریری لیہ میں کھلی کچہری کا انعقاد کیا گیا، جس کی صدارت کمشنر ڈیرہ غازی خان ڈویژن اشفاق احمد چوہدری اور ریجنل پولیس آفیسر ڈیرہ غازی خان اظہر اکرم نے کی۔کھلی کچہری میں شہریوں نے ریونیو، بلدیاتی امور، ستھرا پنجاب، پولیس، صحت اور دیگر محکموں سے متعلق مختلف مسائل اور درخواستیں پیش کیں۔ کمشنر اور آر پی او نے شہریوں کی درخواستیں سنیں اور ان کے ازالے کے لیے متعلقہ افسران کو فوری احکامات جاری کیے۔اس موقع پر کمشنر ڈیرہ غازی خان ڈویژن اشفاق احمد چوہدری نے کہا کہ وزیراعلیٰ پنجاب مریم نواز شریف کی ہدایت پر شہریوں کے مسائل کے فوری اور ترجیحی بنیادوں پر حل کے لیے وہ خود لیہ آئے ہیں تاکہ عوام کو مسائل کے حل کے لیے دفاتر کے غیر ضروری چکر نہ لگانا پڑیں اور انہیں بروقت ریلیف فراہم کیا جا سکے۔انہوں نے کہا کہ شہریوں کے مسائل کا حل انتظامیہ کی اولین ترجیح ہے، تمام متعلقہ افسران اپنی ذمہ داریاں تندہی اور احساس ذمہ داری کے ساتھ ادا کریں۔ شہریوں کی درخواستوں پر صرف کارروائی تک محدود نہ رہا جائے بلکہ مسائل کا عملی حل یقینی بنایا جائے۔ افسران اپنے دفاتر کے دروازے شہریوں کے لیے کھلے رکھیں اور عوامی مسائل سن کر ان کے حل کے لیے مؤثر اقدامات کریں۔کمشنر نے ہدایت کی کہ انتظامیہ شہریوں کو سہولیات کی فراہمی اور ان کے جائز مسائل کے حل کے لیے ہر ممکن تعاون فراہم کرے اور اس سلسلے میں کسی قسم کی غفلت نہ برتی جائے۔ریجنل پولیس آفیسر ڈیرہ غازی خان اظہر اکرم نے کہا کہ پنجاب پولیس شہریوں کے جان و مال کے تحفظ اور امن و امان کے قیام کے لیے پوری ذمہ داری سے کام کر رہی ہے۔ پولیس سے متعلق شہریوں کے مسائل کے فوری ازالے کے لیے مؤثر اقدامات کیے جا رہے ہیں، جبکہ عوام کو محفوظ اور پرامن ماحول فراہم کرنا پولیس کی بنیادی ذمہ داری ہے۔انہوں نے شہریوں پر زور دیا کہ پولیس سے متعلق اپنے مسائل بلاجھجک پیش کریں تاکہ قانون اور میرٹ کے مطابق بروقت کارروائی عمل میں لائی جا سکے۔کھلی کچہری کے موقع پر ڈپٹی کمشنر لیہ آصف علی ڈوگر، ڈسٹرکٹ پولیس آفیسر حسن جاوید اور مختلف محکموں کے افسران بھی موجود تھے۔
