ٹریفک قوانین کی پابندی اپنی اور دوسروں کی زندگیوں کے تحفظ کی ضمانت ہے، ڈی ٹی او ظفر اقبال

لیہ: وزیراعلیٰ پنجاب مریم نواز شریف کے احکامات پر ٹریفک پولیس لیہ کی جانب سے گورنمنٹ کالج لیہ میں ٹریفک آگاہی سیمینار کا انعقاد کیا گیا۔ سیمینار میں ڈسٹرکٹ ٹریفک آفیسر ظفر اقبال نے طلبہ و طالبات کو روڈ سیفٹی اور ٹریفک قوانین بارے تفصیلی بریفنگ دی۔ڈی ٹی او ظفر اقبال نے طلبہ و طالبات کو جوینائل ڈرائیونگ پرمٹ، ڈرائیونگ لائسنس کے اجراء، ہیلمٹ کے استعمال، بغیر نمبر پلیٹ گاڑی چلانے، اوور سپیڈ، اوور لوڈنگ اور ون ویلنگ کے حوالے سے آگاہی فراہم کی۔ انہوں نے کہا کہ ٹریفک قوانین کی پابندی ہر شہری کی ذمہ داری ہے اور احتیاطی تدابیر اختیار کرکے قیمتی انسانی جانوں کو حادثات سے محفوظ رکھا جا سکتا ہے۔انہوں نے طلبہ و طالبات سے کہا کہ موٹر سائیکل چلاتے وقت ہیلمٹ کا استعمال یقینی بنائیں، مقررہ رفتار کی پابندی کریں اور ون ویلنگ سمیت خطرناک ڈرائیونگ سے مکمل اجتناب کریں۔ نوجوان اپنے والدین کی امیدوں اور اپنے مستقبل کو مدنظر رکھتے ہوئے ذمہ دارانہ رویہ اختیار کریں کیونکہ معمولی سی لاپرواہی کسی بھی خاندان کے لیے ناقابل تلافی نقصان کا باعث بن سکتی ہے۔ انہوں نے کہا کہ ٹریفک قوانین پر عملدرآمد صرف قانونی تقاضا نہیں بلکہ اپنی اور دوسروں کی زندگیوں کے تحفظ کا ذریعہ بھی ہے۔