لیہ: ماں اور بچے کی صحت بہتر بنانے اور بچوں میں سٹنٹنگ (قد و قامت کی نشوونما میں رکاوٹ) کے تدارک کے لیے ضلع لیہ میں ورلڈ فوڈ پروگرام کے تعاون سے بے نظیر نشوونما پروگرام شروع کرنے کا فیصلہ کیا گیا ہے۔ اس سلسلہ میں ڈپٹی کمشنر آصف علی ڈوگر کی زیر صدارت پروگرام کے جائزہ اجلاس کا انعقاد ہوا۔ اجلاس میں ایڈیشنل ڈپٹی کمشنر ہیڈ کوارٹر اویس سرور، چیف ایگزیکٹو آفیسر ہیلتھ ڈاکٹر شاہد ریاض، ڈاکٹر مزمل کریم اور متعلقہ افسران نے شرکت کی۔ ورلڈ فوڈ پروگرام کی صوبائی کوآرڈینیٹر ڈاکٹر عمارہ نے اجلاس کو بے نظیر نشوونما پروگرام کے خدوخال اور طریقہ کار بارے بریفنگ دی۔ ڈپٹی کمشنر آصف علی ڈوگر نے پروگرام کے کامیاب آغاز، سروے، رجسٹریشن اور مؤثر عملدرآمد کے لیے ضروری اقدامات اٹھانے کی ہدایت کرتے ہوئے کہا کہ بچوں میں سٹنٹنگ گروتھ کا تدارک ہم سب کی مشترکہ ذمہ داری ہے۔ سٹنٹنگ گروتھ سے بچوں کی جسمانی و ذہنی نشوونما متاثر ہونے کے ساتھ ساتھ مستقبل میں صحت اور ملکی معیشت پر بھی منفی اثرات مرتب ہوتے ہیں۔ اجلاس میں بتایا گیا کہ بے نظیر نشوونما پروگرام پنجاب کے تحت بے نظیر انکم سپورٹ پروگرام میں رجسٹرڈ مستحق حاملہ خواتین اور ماؤں کو خوراک اور مالی معاونت فراہم کی جائے گی۔ پروگرام کا مقصد حاملہ خواتین کو غذائی کمی اور کمزوری سے محفوظ رکھنا، بچوں کی بہتر نشوونما یقینی بنانا اور کم وزن بچوں کی صحت مند پیدائش کے امکانات کو بہتر بنانا ہے۔ اجلاس میں بتایا گیا کہ ضلع لیہ میں پروگرام کا آغاز نومبر میں کیا جائے گا جبکہ مستحق خواتین کو سپورٹ فراہم کرنے کا عملی عملدرآمد دسمبر سے شروع کر دیا جائے گا۔
