واشنگٹن: امریکی نائب صدر جے ڈی وینس کی اہلیہ اور سیکنڈ لیڈی اوشا وینس نے انکشاف کیا ہے کہ وہ اپنے شوہر کو سیاسی معاملات میں کھل کر اور بے لاگ مشورے دیتی ہیں اور مشکل فیصلوں کے دوران ان کی قابلِ اعتماد مشیر کا کردار ادا کرتی ہیں۔
اوشا وینس نے کہا کہ وہ جے ڈی وینس کے پالیسی معاملات میں براہِ راست مداخلت کے بجائے انہیں جذباتی تعاون فراہم کرتی ہیں اور مشکل حالات میں حقیقت پسندانہ رائے دیتی ہیں۔ ان کے مطابق وہ دونوں ہر معاملے پر ایک جیسی رائے نہیں رکھتے، تاہم اختلافات پر کھلے ذہن سے گفتگو کرتے ہیں۔
اوشا وینس نے بتایا کہ سیاسی مہم کے دوران انہوں نے جے ڈی وینس کو سوشل میڈیا پر غیر ضروری تنازعات سے بچنے کے لیے نرم لہجہ اختیار کرنے کا مشورہ بھی دیا تھا۔
جے ڈی وینس کے مطابق اوشا وینس اس وقت انہیں فوری طور پر اپنی رائے سے آگاہ کرتی ہیں جب انہیں محسوس ہو کہ وہ کوئی ایسی بات کہہ رہے ہیں جو حد سے زیادہ آگے نکل گئی ہے۔
اوشا وینس نے جے ڈی وینس کے مستقبل کے سیاسی عزائم سے متعلق قیاس آرائیوں پر کہا کہ فی الحال خاندان کی توجہ مستقبل کے منصوبوں کے بجائے موجودہ اہداف پر مرکوز ہے، جبکہ جے ڈی وینس وسط مدتی انتخابات پر مکمل توجہ دے رہے ہیں۔
