ملک کا دفاع ہمارا جائز حق ہے، ہم نے یہ حق استعمال کیا: ایرانی صدر

تہران: ایرانی صدر مسعود پزشکیان نے کہا ہے کہ اپنے ملک کا دفاع کرنا ایران کا جائز حق ہے اور ایران نے یہ حق استعمال کیا ہے، ایران کمزوری کی حالت میں نہیں بلکہ اپنا دفاع کرنا جانتا ہے۔
40ویں انٹرنیشنل اسلامک یونیٹی کانفرنس سے خطاب کرتے ہوئے ایرانی صدر نے کہا کہ امریکا اور اسرائیل نے مذاکرات کے دوران ایران پر جنگ مسلط کی، ایران نے جنگ شروع نہیں کی بلکہ جارحیت کرنے والوں کے سامنے مضبوط مزاحمت کے ذریعے اپنا دفاع کیا۔
مسعود پزشکیان نے کہا کہ فلسطین کے دفاع اور اس پر قبضے کو مسترد کرنا ایران اپنی ذمہ داری سمجھتا ہے۔ اسلامی ممالک کو ایک دوسرے کی سلامتی کو نقصان نہ پہنچانے کا عہد کرنا چاہیے۔
ایرانی صدر نے مزید کہا کہ اسلامی ممالک کو خطے کی سلامتی کی ذمہ داری خود سنبھالنی چاہیے اور باہمی تعاون کے ذریعے خطے میں امن و استحکام کو فروغ دینا چاہیے۔