کراچی:وزیراعلیٰ سندھ مراد علی شاہ نے نئے صوبوں کے قیام کی مخالفت کرتے ہوئے کہا ہے کہ جس کو نئے صوبے بنانے کا شوق ہے وہ سندھ اسمبلی میں قرارداد لے آئے، اسمبلی ایک بار پھر نئے صوبوں کی مخالفت میں قرارداد منظور کر سکتی ہے۔
سندھ انسٹیٹیوٹ آف اینیمل ہیلتھ میں نئی سہولتوں کی افتتاحی تقریب سے خطاب کرتے ہوئے مراد علی شاہ نے کہا کہ سندھ اسمبلی پہلے بھی 6 مرتبہ نئے صوبوں کے خلاف قراردادیں منظور کر چکی ہے اور اب بھی ایسا کیا جا سکتا ہے۔
وزیراعلیٰ سندھ نے کہا کہ پمز اسپتال میں پیش آنے والا واقعہ دل خراش ہے، اداروں کو مزید بہتر بنانے کی ضرورت ہے۔ بلدیاتی نظام کو مضبوط اور اس کی استعداد کار بڑھانا حکومت کے منشور کا حصہ ہے، دیگر صوبوں کو بھی بلدیاتی اداروں کو مضبوط بنانا چاہیے۔
مراد علی شاہ نے سندھ انسٹیٹیوٹ آف اینیمل ہیلتھ میں جدید سہولتوں کے قیام کو اہم پیش رفت قرار دیتے ہوئے کہا کہ جدید اسپتال، تشخیصی و تحقیقی کمپلیکس اور لیبارٹریز سے جانوروں کی بیماریوں کی بروقت تشخیص، علاج اور نگرانی میں مدد ملے گی۔
انہوں نے کہا کہ ویٹرنری ماہرین اور محققین کی نئی نسل تیار کرنا ترجیح ہے جبکہ ادارے کو ویٹرنری تعلیم، تحقیق اور تشخیص کا مرکز بنایا جائے گا۔ ویکسین کی تیاری کی صلاحیت بھی مزید مستحکم کی جائے گی۔
