اسلام آباد: سپریم کورٹ نے پی بی 9 کوہلو میں دوبارہ گنتی سے متعلق انتخابی تنازع کے کیس کی سماعت کرتے ہوئے مقدمہ تین رکنی بینچ کے سامنے مقرر کرنے کا حکم دے دیا۔
جسٹس نعیم اختر افغان کی سربراہی میں دو رکنی بینچ نے کیس کی سماعت کی۔ دوران سماعت درخواست گزار کے وکیل کامران مرتضیٰ نے مؤقف اختیار کیا کہ رولز کے مطابق تین رکنی بینچ الیکشن ٹریبونل کے خلاف اپیلیں سن سکتا ہے، تاہم سپریم کورٹ کے نئے رولز میں الیکشن ٹریبونل کا ذکر موجود نہیں۔
جسٹس نعیم اختر افغان نے ریمارکس دیے کہ چار پولنگ اسٹیشنز پر پولنگ ہوئی اور معاملہ غیرحقیقی ٹرن آؤٹ کا ہے۔ عدالت نے کہا کہ غیرحقیقی ٹرن آؤٹ سے متعلق سپریم کورٹ پہلے بھی فیصلہ دے چکی ہے، جبکہ موجودہ کیس میں بھی ٹرن آؤٹ 80 فیصد سے زیادہ ہونے کا معاملہ سامنے آیا ہے۔
عدالت نے کیس کی مزید سماعت ستمبر کے دوسرے ہفتے تک ملتوی کردی۔
واضح رہے کہ پی بی 9 کوہلو سے مسلم لیگ ن کے نواب چنگیز مری کامیاب ہوئے تھے، جن کی کامیابی کو پیپلز پارٹی کے نصیب اللہ نے چیلنج کر رکھا ہے۔
