اسلام آباد: امیر جماعت اسلامی حافظ نعیم الرحمٰن نے پمز اسپتال میں پیش آنے والے واقعے پر افسوس کا اظہار کرتے ہوئے کہا ہے کہ اس سانحے نے پوری قوم کو غم میں مبتلا کر دیا، سرکاری اسپتال میں حفاظتی اقدامات کا فقدان انتہائی تشویشناک ہے۔
حافظ نعیم الرحمٰن نے کہا کہ ملک میں گورننس نام کی کوئی چیز نہیں، واقعات رونما ہوتے رہتے ہیں لیکن حفاظتی اقدامات کرنا حکومت کی ذمہ داری ہے۔ پمز اسپتال میں مناسب سیکیورٹی اور حفاظتی انتظامات موجود نہیں تھے جبکہ ڈاکٹروں اور عملے کو ضروری تربیت دینے کا بھی مؤثر نظام نہیں۔
امیر جماعت اسلامی نے کہا کہ سرکاری اسپتال سے بچے کا چوری ہونا انتہائی افسوسناک اور ناقص حکمرانی کی واضح مثال ہے۔ انہوں نے مطالبہ کیا کہ واقعے کے تمام ذمہ داران کے خلاف کارروائی کی جائے اور محض افسران کی معطلی کو کافی نہ سمجھا جائے۔
حافظ نعیم الرحمٰن نے جماعت اسلامی کے پٹرولیم لیوی اور مہنگائی کے خلاف جاری دھرنے کا ذکر کرتے ہوئے کہا کہ احتجاج کا 12واں روز ہے اور ہمارا مطالبہ عوام کے مفاد میں ہے۔ پٹرولیم لیوی ختم کرکے پٹرول سستا کیا جائے اور آئی پی پیز کے ناجائز معاہدے ختم کیے جائیں۔
