لیہ: ڈی پی او لیہ حسن جاوید بھٹی نے کہا ہے کہ محکمہ پولیس میں بدعنوانی کے خاتمے، محکمانہ کارکردگی بہتر بنانے اور تھانہ کی سطح پر مظلوموں کو فوری انصاف کی فراہمی کے لیے زیرو ٹالرینس پالیسی پر سختی سے عملدرآمد یقینی بنایا جائے گا۔
ڈی پی او لیہ حسن جاوید بھٹی کی زیرصدارت دفتر پولیس کے کانفرنس روم میں رات گئے اجلاس منعقد ہوا، جس میں ایس انویسٹی گیشن مدثر اقبال، ڈی ایس پیز اور ایس ایچ اوز نے شرکت کی۔ اجلاس میں زیرِ تفتیش مقدمات اور پولیس کی مجموعی کارکردگی کا جائزہ لیا گیا۔
اس موقع پر ڈی پی او حسن جاوید بھٹی نے ہدایت کی کہ وزیراعلیٰ پنجاب اور آئی جی پنجاب کی کرپشن کے خلاف زیرو ٹالرینس پالیسی پر پوری طرح عمل کیا جائے۔ مقدمات کی تفتیش میرٹ پر کرتے ہوئے سائلین کو مکمل انصاف فراہم کیا جائے اور تھانوں میں آنے والے شہریوں کو بلا انتظار پولیس سروسز فراہم کی جائیں۔
انہوں نے افسران و اہلکاروں کو ہدایت کی کہ شہریوں کے ساتھ خوش اخلاقی سے پیش آیا جائے اور ان کی شکایات کو ترجیحی بنیادوں پر سنا جائے۔ ڈی پی او نے واضح کیا کہ کسی بھی افسر یا اہلکار کی بدعنوانی ہرگز برداشت نہیں کی جائے گی اور محکمہ پولیس میں شفافیت و میرٹ کو ہر صورت یقینی بنایا جائے گا۔
