لاہور: وفاقی وزیر داخلہ محسن نقوی نے کہا ہے کہ انسانی اسمگلنگ اور حوالہ ہنڈی مافیا کی پوری چین کو قانون کی گرفت میں لایا جائے، جرائم پیشہ گینگز کے خلاف ایف آئی اے کا کریک ڈاؤن مؤثر اور اس کے نتائج واضح طور پر نظر آنے چاہئیں۔
وفاقی وزیر داخلہ نے لاہور میں ایف آئی اے زونل آفس کا دورہ کیا اور اجلاس کی صدارت کی، جہاں ایف آئی اے زونل آفس کے اپ گریڈیشن پراجیکٹ کا جائزہ لیا گیا۔ اجلاس میں ملک بھر کے ایئرپورٹس پر امیگریشن کاؤنٹرز کے پرانے کیمرے تبدیل کرکے جدید ٹیکنالوجی سے لیس کیمرے نصب کرنے کی اصولی منظوری دی گئی۔
اجلاس میں شکایات کے اندراج کے لیے پاک آئی ڈی ایپ کی خدمات حاصل کرنے کا بھی اصولی فیصلہ کیا گیا۔ بریفنگ میں بتایا گیا کہ ایف آئی اے نے گزشتہ ایک سال کے دوران 1670 ایف آئی آرز درج کیں، 5 ہزار میں سے 4 ہزار انکوائریز نمٹائی گئیں جبکہ 295 اشتہاری ملزمان کو گرفتار کیا گیا۔
