لیہ: جس سہانی گھڑی چمکا طیبہ کا چاند، اس دل افروز ساعت پہ لاکھوں سلام۔ آنکھ پُرنم اور ہر دل سرور و مسرت سے لبریز۔جشن عید میلاد النبی کی عظیم الشان اور مرکزی محفل میلاد گراؤنڈ لیہ میں انتہائی عقیدت و احترام اور مذہبی جوش و جذبے کے ساتھ منعقد ہوئی۔ میلاد گراؤنڈ کو خوبصورت بینرز، جھنڈیوں سے سجایا گیا تھا جبکہ محفل میں آنے والے عاشقان مصطفیٰ کے لئے پانچ ہزار نشستوں کا خصوصی اہتمام کیا گیا۔محفل میں ڈپٹی کمشنر آصف علی ڈوگر،ڈسٹرکٹ پولیس آفیسر حسن جاوید بھٹی، ایڈیشنل ڈپٹی کمشنرز شبیر احمد ڈوگر،محمد اویس سرور چشتی، علاقہ کی معروف مذہبی شخصیت پیر سید سبط الحسنین شاہ گیلانی، سابق ممبران اسمبلی پیر سید ثقلین شاہ بخاری، پیر سید رفاقت علی گیلانی، اسسٹنٹ کمشنر رانا زوہیب کریم، صدر انجمن تاجران اظہر ہانس،صدر ڈسٹرکٹ پریس کلب محسن عدیل،محمد عمران بریال اور دیگر ضلعی افسران نے شرکت کی۔محفل کا باقاعدہ آغاز تلاوت قرآن پاک،نعت رسول مقبول، قصیدہ بردہ شریف، پرچم کشائی اور قومی ترانے سے کیا گیا۔ اس موقع پر خطاب کرتے ہوئے ڈپٹی کمشنر آصف علی ڈوگر نے کہا کہ نبی کریم کی ولادت باسعادت پوری انسانیت کے لئے اللہ تعالیٰ کی عظیم نعمت اور رحمت ہے سیرت طیبہ ہمارے لئے زندگی کے ہر شعبے میں رہنمائی کا سرچشمہ ہے۔انہوں نے کہا کہ ہمیں چاہیے کہ حضور اکرم کی تعلیمات کو اپنی عملی زندگی کا حصہ بنائیں اور معاشرے میں امن، محبت، اخوت، مساوات اور بھائی چارے کو فروغ دیں۔ انہوں نے کہا کہ جشن عید میلاد النبی کے موقع پر ضلعی انتظامیہ کی جانب سے بہترین انتظامات یقینی بنائے گئے ہیں اور تمام متعلقہ اداروں نے اپنی ذمہ داریاں احسن انداز میں ادا کی ہیں۔ ڈسٹرکٹ پولیس آفیسر حسن جاوید بھٹی نے کہا کہ حضور نبی کریم کی سیرت مبارکہ امن، محبت اور بھائی چارے کا درس دیتی ہے عید میلاد النبی کے موقع پر پرامن اور محفوظ ماحول کی فراہمی کے لئے فول پروف سکیورٹی انتظامات کئے گئے ہیں جلوس کے روٹس، مرکزی تقریب کے مقام اور اہم مقامات پر سکیورٹی اہلکار تعینات کئے گئے جبکہ ٹریفک کی روانی برقرار رکھنے کے لئے بھی خصوصی انتظامات کئے گئے۔سابق ایم این اے پیر سید ثقلین شاہ بخاری نے کہا کہ اس طرح کی محافل دراصل ہماری محبت رسول کے اظہار کا ذریعہ ہیں حضور نبی کریم کی ولادت باسعادت سے کائنات میں نور ہی نور پھیل گیا اور اندھیروں کا خاتمہ ہوا۔انہوں نے کہا کہ آج امت مسلمہ کے لئے لازم ہے کہ وہ سیرت النبی کو اپنی عملی زندگی کا حصہ بنائے اگر ہم تعلیمات نبوی پر عمل پیرا ہوں تو دنیا و آخرت میں کامیابی ہمارے قدم چومے گی۔سابق ایم پی اے پیر سید رفاقت علی گیلانی نے کہا کہ حضور نبی کریم کی ولادت سے کائنات کی فضائیں جگمگا اٹھیں نبی اکرم کی تعلیمات پر عمل کر کے ہی ہم اپنی ذاتی، سماجی اور قومی زندگی میں کامیابی حاصل کر سکتے ہیں سیرت رسول ہمارے لئے دنیا و آخرت کی نجات کا راستہ ہے اور ہمیں اپنی زندگیوں کو اسوہ حسنہ کے مطابق ڈھالنے کا عہد کرنا چاہیے۔ مفتی احمد رضا اعظمی نے خطاب کرتے ہوئے کہا کہ ہماری کامیابی اسی میں ہے کہ ہم اپنی زندگیاں دین اسلام کے مطابق بسر کریں سیرت النبی ہمیں اخوت، محبت، برداشت، عدل و انصاف کا درس دیتی ہے اور یہی اوصاف معاشرے میں حقیقی امن و سکون کی ضمانت ہیں۔ انہوں نے کہا کہ جشن عید میلاد النبی کا یہ بابرکت اور مقدس موقع ہمیں اس بات کی تجدید عہد کا پیغام دیتا ہے کہ ہم نبی آخر الزمان کی سیرت طیبہ پر عمل پیرا ہوں۔محفل کے دوران بارگاہ رسالت میں گلہائے عقیدت پیش کئے گئے جبکہ شرکاء میں شیرینی بھی تقسیم کی گئی۔ آخر میں پیر سید سبط الحسنین شاہ گیلانی نے ملکی سلامتی، استحکام، امن و خوشحالی اور امت مسلمہ کے لئے خصوصی دعا کروائی۔ بعد ازاں ختم نبوت چوک پر فیتہ کاٹ کر مرکزی جلوس کا باقاعدہ افتتاح کیا گیا جو اپنے روایتی راستوں سے ہوتا ہوا پرامن انداز میں اختتام پذیر ہوا۔ شرکاء ریلی کے لئے 105 دیگوں کا خصوصی اہتمام کیا گیا۔ میلاد کمیٹی کے منتظمین قاری محمد یاسین اور حاجی احمد حسن کلاسرہ نے بہترین انتظامات پر ضلعی انتظامیہ کا شکریہ ادا کیا۔ تحصیل چوبارہ اور تحصیل کروڑ میں بھی جشن عید میلاد النبی کے سلسلہ میں جلوس اور ریلیاں نکالی گئیں جن کی قیادت متعلقہ اسسٹنٹ کمشنرز نے کی۔
