لیہ:ڈسٹرکٹ سپورٹس کمپلیکس لیہ کی جم اینڈ فٹنس انسٹرکٹر سمعیہ قیوم کو کھیلوں کے میدان میں نمایاں خدمات، بالخصوص خواتین کے لیے کھیلوں اور فٹنس کی سہولیات کے فروغ،اعلیٰ کارکردگی اور پیشہ ورانہ صلاحیتوں کے اعتراف میں لاہور میں منعقدہ قومی سطح کی تقریب کے دوران قائداعظم گولڈ میڈل ایوارڈ سے نواز دیا گیا۔سمعیہ قیوم ڈسٹرکٹ سپورٹس کمپلیکس لیہ میں بطور جم اینڈ فٹنس انسٹرکٹر اپنی ذمہ داریاں احسن انداز میں انجام دے رہی ہیں اور خواتین و طالبات کے لیے جم، فٹنس اور کھیلوں کی سرگرمیوں میں بھرپور رہنمائی فراہم کر رہی ہیں۔ وہ خواتین کو صحت مند اور فعال طرزِ زندگی اپنانے کے ساتھ ساتھ کھیلوں کی سرگرمیوں میں حصہ لینے کی ترغیب دینے کے لیے بھی خدمات سرانجام دے رہی ہیں۔ قومی سطح کی تقریب میں سمعیہ قیوم کی خواتین کے لیے کھیلوں اور فٹنس کے شعبے میں خدمات، مثالی کارکردگی اور فرائضِ منصبی کو سراہتے ہوئے انہیں قائداعظم گولڈ میڈل ایوارڈ پیش کیا گیا۔ انہیں بیسٹ جم اینڈ فٹنس انسٹرکٹر کا اعزاز بھی دیا گیا، جو ان کی پیشہ ورانہ صلاحیتوں، محنت اور خواتین میں کھیلوں کے فروغ کے لیے خدمات کا اعتراف ہے۔ سمعیہ قیوم کو قائداعظم گولڈ میڈل ایوارڈ ملنے پر سپورٹس حلقوں، ساتھیوں اور شہریوں نے خوشی کا اظہار کرتے ہوئے انہیں مبارکباد پیش کی اور مزید کامیابیوں کے لیے نیک خواہشات کا اظہار کیا۔
