لیہ: وزیر اعلیٰ پنجاب مریم نواز شریف کے احکامات کی روشنی میں لیہ میں دریائی کٹاؤ کے سدباب کے لئے اقدامات شروع کر دیے گئے ہیں۔ وزیر اعلیٰ پنجاب کی ہدایت پر ڈائریکٹر جنرل پنجاب ڈیزاسٹر مینجمنٹ اتھارٹی سیف انور جپہ موضع سمرا نشیب، بستی کنجال لیہ پہنچ گئے۔ ڈپٹی کمشنر آصف علی ڈوگر، سابق ایم پی اے عبدالشکور سواگ، چیف انجینئر انہار سرگودھا صداقت لطیف، سپرنٹینڈنگ انجینئر بھکر عدنان امجد، ریزیڈنٹ انجینئر منصور احمد، ایکسیئن انہار حفیظ احمد اور ڈائریکٹر آپریشنز پی ڈی ایم اے نثار احمد بھی ان کے ہمراہ تھے۔ ڈی جی پی ڈی ایم اے سیف انور جپہ نے متاثرہ علاقہ سمرا نشیب کا دورہ کیا اور پہنچنے والی بھاری مشینری، پتھروں اور جاری کام کا معائنہ کیا۔ اس موقع پر انہیں محکمہ انہار کی طرف سے دریائی کٹاؤ اور جاری اقدامات بارے بریفنگ دی گئی۔ڈی جی سیف انور جپہ نے علاقہ مکینوں سے گفتگو کرتے ہوئے کہا کہ وزیر اعلیٰ پنجاب مریم نواز شریف کے احکامات پر کٹاؤ روکنے کے لئے فوری طور پر کام شروع کر دیا گیا ہے حکومت پنجاب، ضلعی انتظامیہ اور پی ڈی ایم اے دکھ کی اس گھڑی میں عوام کے ساتھ کھڑی ہے۔ انہوں نے کہا کہ مزید نقصان سے بچنے کے لئے دریائی کٹاؤ کے تدارک کے فوری اقدامات کئے جا رہے ہیں جبکہ علاقہ اور مکینوں کے تحفظ اور مسئلہ کے مستقل حل کے لئے فلڈ پروٹیکشن بند کی تعمیر کے لئے بھرپور کوشش کی جائے گی۔انہوں نے کہا کہ پانی کا رخ موڑنے کے لئے قابل عمل دیگر آپشنز پر بھی عمل کیا جائے گا۔ ڈی جی پی ڈی ایم اے نے تمام متعلقہ محکموں کو باہمی تعاون اور رابطہ کاری کے ذریعے دریائی کٹاؤ کے تدارک کے لئے کام کرنے، آبادیوں اور انفراسٹرکچر کو بچانے کے لئے ہر ممکن کوشش کرنے اور متاثرہ علاقہ میں ریسکیو اینڈ ریلیف آپریشن جاری رکھنے کی ہدایت کی۔ انہوں نے دریائی کٹاؤ کے لئے جاری اقدامات بارے روزانہ کی بنیاد پر رپورٹ دینے کی ہدایت بھی کی۔ ڈی جی پی ڈی ایم اے نے بتایا کہ وزیر اعلیٰ پنجاب کی ہدایت پر متاثرہ علاقے میں فلڈ ریلیف کیمپس فراہم کر دیے گئے ہیں اور متاثرین کو تمام تر بنیادی سہولیات کی فراہمی یقینی بنائی جائے گی۔ انہوں نے متاثرین کے لئے فوڈ ہیمپر بھجوانے کی بھی ہدایت کی۔
