لیہ: بٹیر کے غیر قانونی شکار کے خلاف کریک ڈاؤن، 5 سیٹ اپ قبضہ میں، دو شکاریوں کو جرمانہ۔ اسسٹنٹ چیف وائلڈ لائف رینجرز سدرتہ المنتہیٰ کی سربراہی میں ضلع بھر میں بٹیر کے غیر قانونی شکار کے خلاف کریک ڈاؤن جاری ہے۔ کارروائیوں کے دوران مختلف مقامات پر بٹیر کے غیر قانونی شکار کے 5 سیٹ اپ، جال، بیٹریاں، سپیکر اور دیگر سامان قبضہ میں لے لیا گیا۔ وائلڈ لائف ٹیموں نے غیر قانونی شکار میں ملوث افراد کے خلاف قانونی کارروائی کرتے ہوئے دو افراد کو مجموعی طور پر 50 ہزار روپے جرمانہ عائد کیا، جبکہ 3 کیسز زیرِ سماعت ہیں۔ اسسٹنٹ چیف وائلڈ لائف رینجرز سدرتہ المنتہیٰ نے کہا کہ حکومت پنجاب کی واضح ہدایات کے مطابق بٹیر کا جال کے ذریعے شکار غیر قانونی اور ممنوع ہے۔ ضلع بھر میں غیر قانونی شکار کی روک تھام کے لیے مسلسل کڑی مانیٹرنگ جاری ہے۔ انہوں نے کہا کہ غیر قانونی شکار میں ملوث افراد کے خلاف بلاامتیاز قانون کے مطابق کارروائی عمل میں لائی جائے گی۔
