لیہ: پیر جگی شریف کے قریب نہر میں شگاف، ڈپٹی کمشنر کا فوری نوٹس، بھاری مشینری سے مرمتی کام شروع

لیہ:ڈپٹی کمشنر لیہ آصف علی ڈوگر کا پیر جگی شریف کے قریب بھاگل نہر میں شگاف پڑنے کا فوری نوٹس۔محکمہ انہار کی ٹیمیں اور بھاری مشینری موقع پر پہنچ گئی۔ ڈپٹی کمشنر کی ہدایت پر محکمہ انہار کے متعلقہ افسران و اہلکاروں نے موقع پر پہنچ کر نہر میں پڑنے والے شگاف کو پُر کرنے کے لیے فوری طور پر امدادی و مرمتی کارروائی شروع کر دی۔ بھاری مشینری کے ذریعے شگاف کو مٹی سے بھرنے اور نہری پشتے کو مضبوط بنانے کا کام تیزی سے جاری ہے۔ متعلقہ عملہ شگاف کے مقام پر موجود رہ کر مرمتی کام مکمل کرنے میں مصروف ہے جبکہ نہر کے پشتے اور اردگرد کے علاقے کی بھی نگرانی کی جا رہی ہے تاکہ مزید نقصان کا خدشہ نہ رہے۔ ڈپٹی کمشنر آصف علی ڈوگر نے متعلقہ افسران کو ہدایت کی کہ شگاف کو مکمل طور پر بند کرنے اور نہری نظام کو محفوظ بنانے کے لیے تمام ضروری وسائل بروئے کار لائے جائیں اور مرمتی کام میں کسی قسم کی تاخیر نہ کی جائے۔ انہوں نے کہا کہ نہری شگاف کی اطلاع ملتے ہی فوری کارروائی عمل میں لائی گئی ہے، شہریوں اور قریبی آبادیوں کے تحفظ کو ہر صورت یقینی بنایا جائے گا۔ انہوں نے متعلقہ محکمے کو ہدایت کی کہ مرمتی کام کی تکمیل تک موقع کی مسلسل نگرانی جاری رکھی جائے اور صورتحال سے ضلعی انتظامیہ کو آگاہ رکھا جائے۔